دينا الشربيني عن "لا ترد ولا تستبدل": علمني إن "الصحة تاج" وطايرة من الفرحة بكل ردود الفعل

نهال ناصر | فى حياة المشاهير

دينا الشربيني

السبت , 10 يناير 2026 - 13:57 | اخر تحديث: السبت , 10 يناير 2026 - 13:57

وجهت الفنانة دينا الشربيني بعض الرسائل عقب انتهاء مسلسل "لا ترد ولا تستبدل".

ونشرت دينا الشربيني فيديو للقطات من كواليس التصوير وكتبت: "مش عارفة أبتدي منين ولا أوصف مشاعري إزاي.. رحلة "لا ترد ولا تستبدل" خلصت، بس الأثر اللي سابته جوايا والذكريات اللي عشتها فيها محفورة في قلبي للأبد، عايزة أقول من كل قلبي إن دي كانت من أجمل وأصدق الكواليس اللي عشتها في حياتي.. مكنش مجرد لوكيشن تصوير، كنا عيلة حقيقية، بنخاف على بعض وبنسند بعض في كل لحظة".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وفي رسالتها لمخرجة ومنتج المسلسل قالت دينا الشربيني: "مريم أبو عوف.. الأستاذة، المايسترو، والأخت اللي بتطبطب برؤيتها.. شكراً على اهتمامك "المرعب" بكل تفصيلة، وشكراً إنك خلقتي لينا عالم آمن ومريح قدرنا نطلع فيه كل مشاعرنا بصدق، المنتج الغالي عبد الله أبو الفتوح.. شكراً ليك على احترافيتك وتوفير كل سبل النجاح عشان نطلع عمل محترم ومختلف يليق بجمهورنا العظيم، زمايلي وإخواتي المبدعين.. هتوحشوني أوي وبحبكم فوق ما تتخيلوا، بجد كنتوا طاقة حب مابتخلصش".

دينا الشربيني في مسلسل لا ترد ولا تستبدل

نرشح لك: أحمد عبد الحميد يعلن رحيل ابنته: مش عارف ربنا بيحبني ولا مش بيحبني عشان ياخد مني أبويا وبنتي في أسبوعين

كما وجهت رسالة للفنان أحمد السعدني قالت فيها: "السعدني.. أخويا وعشرة العمر ورفيق الرحلة، الكلام في حقك مش كفاية، ودايماً وشنا حلو على بعض وبنطلع أحلى ما عندنا سوا.. يارب دايماً ناجحين مع بعض، كل طاقم العمل.. بشكركم واحد واحد من قلبي، أنتوا بجد عيلتي اللي بفتخر بيها وبحترم تعبها وشطارتها".

عرض هذا المنشور على Instagram

‏‎تمت مشاركة منشور بواسطة ‏‎Dina Elsherbiny‎‏ (@‏‎dinaelsherbinyy‎‏)‎‏

وحرصت دينا الشربيني على توجيه رسالة لكل مريض قائة: "رسالة خاصة من جوه قلبي لكل حد ربنا اختبره بالمرض.. انتم الأبطال الحقيقيين، ابتلاء كبير بس أنتوا قدها، إحنا بنتعلم منكم الصبر والقوة والرضا.. كلنا في ضهركم وبندعمكم، وبإذن الله ربنا يكتبلكم الشفاء التام"

واختتمت كلامها برسالة لجمهورها قالت فيها: "وأخيراً.. الجمهور العظيم.. أنا بقرأ كل كلمة وكل حرف بتكتبوه، ومبسوطة وطايرة من الفرحة بكل ردود أفعالكم وتفاعلكم مع قصة "ريم" ووجعها وأملها.. شكراً إنكم حسيتوا بينا ووصلكم صدقنا. المسلسل ده علمني إن "الصحة تاج" حقيقي، وإن الحب الصادق والمواقف النبيلة هما بس اللي باقيين في الآخر".

وتدور أحداث "لا ترد ولا تستبدل" حول امرأة مصابة بالفشل الكلوي تدخل سباقًا مع الزمن للبحث عن متبرع ينقذ حياتها، وسط شبكة من العلاقات الإنسانية والأسرية التي تكشف جوانب مختلفة من الصراع اليومي.

ويشارك في بطولة المسلسل: دينا الشربيني، أحمد السعدني، حسن مالك، فدوى عابد، وصدقي صخر.