خالد الصاوي: لولا أمي وأبويا وأختي كنت بقيت مجرم

FilFan | فى سينما وتلفزيون

خالد الصاوي

الأربعاء , 31 ديسمبر 2025 - 12:12 | اخر تحديث: الأربعاء , 31 ديسمبر 2025 - 12:12

قال الفنان خالد الصاوي: لولا والدتي ووالدي وأختي كان ممكن أكون مجرم، أنا كنت استكبر إني أخاف، أحيانًا متهور وأحيانًا مندفع وأحيانًا عنيد وصدامي، لكم هما كانوا بيحطوا لك قيم ورحمة ويجذبوا ناحية حاجات أحيانًا بالشدة وأحيانا باللين.

وأضاف في لقائه مع الإعلامي أحمد سالم في برنامج كلمة أخيرة عبر قناة ON: "أبويا وأمي تعبوا معايا جدًا، أمي وأنا في ابتدائي كانت بتدعي إني ما أدخلش الإصلاحية وأنا في ثانوي كانت بتدعي إني ما أدخلش السجن، وأنا في الجامعة كانت بتدعي ما ادخلش المعتقل، وكانت فاكرة إني لما اتخرج هترتاح، ومع ذلك الحمد لله أبويا دعمني بعقله وأمي بعاطفتها".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابع: أبويا لما يحصل حاجة وأكذب، يصدقني ويقول لي خالد ما بيكذبش وراجل، فتصعب عليا نفسي فأبطل المرة اللي بعدها، وكان يقولي لو قلت لي الحقيقة محدش هيلمسك حتى لو عامل مصيبة، لكن لو كذبت نهارك هيبقى أسود، فجربته وكنت بقوله الحقيقة حتى لو كانت فادحة وكان صادق معايا، كان يسألني أنت راجل ولا لأ؟ أقوله آه طبعا، يقولي يبقى كلمتك تكون واحدة.

أما والدته وأخته فقال عنهما: أمي نضفت كتير في شخصيتي بالرحمة، وأختي رغم أنها كانت أصغر مني لكن أحيانا بتكون حكيمة كأنها هي الأكبر، استوعبوني بالدفا والحنان وخلوني أفكر فيهم قبل أي مصيبة.

وكشف خالد الصاوي أن والداه كانا فخورين بما وصل إليه رغم خوفهما الشديد عليه في البداية: كانوا خايفين في الأول، لأني كنت في الجامعة بعمل كل الأنشطة الفنية والأدبية والسياسية وكنت داخل في 100 حاجة فكان الإحساس عندهم إني ممكن أكون مروش أو مشتت أو طماع وعاوز أعمل مية حاجة.

وأكمل: لما اتخرجت لأول وهلة اتقال أنه هيبقى شاعر وهاوي، لكن هيشتغل مع أبوه في المحاماه ويركز، ومفيش مانع يكون بيكتب، لكني فاجأت والدي وقلت له مش هشتغل محامي تاني وهو باله طويل، وقلت له هكون فنان وهكتب وهخرج وهمثل وهعمل مزيكا طبعا بالنسبة له صدمة، وأمي شافت إني بضيع.

وأكمل: "الظروف كانت صعبة جدا، وعملت فيها راجل، وكنت لما اتزنق أروح لأبويا أقوله اشتغل معاك لأني مكانش معايا فلوس، يقولي هو أنا فاتحها سبيل".

وعن ذكرياته في المحاماة، قال: "أول مرة اترافع جنحة خدوا حكم هما الاتنين فروحت متعكنن أوي، وأبويا قال لي أنت عملت مسرحيات ما وقعتش في أولها؟ ولعبت رياضة ما اضربتش؟ قال لي هي المحاماة كده، أنا اضايقت يمكن علشان هي جنحة فحسيت أن المحامي بينقذ الأرواح".