خاص محمد كريم يتحدث لـ"في الفن" عن رفضه تغيير اسمه وصعوبات هوليود وإمكانية مشاركته في أعمال مصرية وفيلمه الجديد مع آل باتشينو وميجان فوكس

محمد عبد الخالق | فى سينما وتلفزيون

محمد كريم

السبت , 6 ديسمبر 2025 - 18:06 | اخر تحديث: السبت , 6 ديسمبر 2025 - 18:06

في السنوات الأخيرة تمكن الفنان محمد كريم من التواجد في هوليوود والمشاركة في عدد من الأفلام وتغيير الصورة النمطية للممثل العربي في السينما هناك، ابتعد عن تقديم دور الإرهابي وقدم شخصيات متنوعة.

التقى FilFan.com بمحمد كريم خلال حضورة فعاليات الدورة الخامسة من مهرجان البحر الأحمر السينمائي وحدثنا عن مشواره الفني في الخارج والصعوبات التي واجهته وفكرة العودة والمشاركة في أعمال في مصر والوطن العربي.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وكان لنا هذا الحوار معه:

إزاي بتشوف رد فعل الجمهور على أعمالك وتواجدك وسط نجوم هوليوود؟

في ناس كتير في الوطن العربي بيجوا يشوفوا مستقبلك من منظورهم يعني يجي وشايف محمد أن لو كان عمل كام فيلم على كام مسلسل دا صح طب انت بناء على إيه بتقول دا، مشكلتنا إن إحنا كل واحد عنده خلفية معينة أو عنده شوية ثقافة معينة أو يتفرج على ممثلين تانين فشايف إن هي دي الطريقة المثلى في النجاح، أنا مثلا عارف أنا عايز إيه من اليوم الأول بس مشكلة اللي أنا كنت عايزه بياخد بتاع عشرين سنة وده الناس مش عارفاه فصعب قوي تحقيقة إلا لو إنت بقى مركز فيه زي ما أنا ركزت فيه من زمان فأنا عارف من الأول أنا بعمل مسلسلات بعمل أفلام قدمت The Voice عملت فيلم زي "دكان شحاتة" مين اللي خد "دكان شحاتة" وطلع بيه "مهرجان كان"؟ محدش كان مهتم أصلا بالفيلم دا إنه يطلع "كان" أنا كنت مصر جدا وطلعت بيه؟ أنا وكل صناع الفيلم، وفيلم "قبلات مسروقة" اللي أنا عملته أكتر فيلم اتعرض في مهرجات في العالم أنا رحت نيويورك مخصوص وعملنا عروض.

وتابع محمد كريم: "فأنا عارف أنا بعمل إيه من زمان مش مهم بقى مين بيفهم مش دي قصتي المهم إن أنا أوصل اللي أنا عايزه، فيه ناس مظلومة لأنهم مش عارفين بقى هم شايفين محمد آخر 9 سنين في أمريكا وبيعمل أفلام وكده هم مش عارفين وفجأة طلعت الأفلام فمش فاهمين فاكرين إن دي اتعملت في يوم وليلة مش عارفين قبلها بتاع 20 سنة.

محمد كريم

وأكمل: "في ناس تقولك ما تعمل مسلسل في رمضان ما تعمل حاجة في السينما هنا أكيد أنا واحشني الجمهور بس الفكرة أنا عايز أيه مش أنت عايز إيه، محمد صلاح قال قبل كده في حوار "أنا مليش دعوة أنت بتفكرلي ليه وبتخططلي" دا مش تعالي الفكرة أن كل واحد حابب إيه، أنا خريج كلية الطب ودخلت التمثيل عشان بحبه، فبديه كل حاجة بجد، أنا مدخلتش كلية الطب عشان عيلتي أنا حبيته من وأنا صغير، أنا خلصت كلية الطب وعملت ماجستير واشتغلت طبيب تخصص عظام، وبعدها بدأت أمثل وكنت مش عايز أسيب الطب، اخترت تخصص ينفع معايا وعندنا مركز للعلاج الطبيعي.

في وطنا العربي عدد قليل من النجوم اللي قدورا يحققوا العالمية، كلمنا عن مشوارك للوصول للعالمية.

كلمة العالمية استهلكت بس هي بجد كلمة صعبة إنت لو تفكر فيها الموضوع مش سهل وفي مفهوم غلط عندنا في العالمية، وهو العالمية عندنا سواء في التمثيل أو في الغناء إن إنت تروح تعمل تعاون مثلا دويتو أو تعمل أي حاجة عشان تشتغل أكتر في الوطن العربي دي وجهة نظر خاطئة اللي هي معمول بيها، أنا لما قررت أتجه لهوليوود قعدت هناك وركزت هناك واشتغلت هناك وكل حاجة لهناك ليه؟ لما هتعمل هناك هتوصل لكل الدنيا ما كانش هدفي أن أنا أروح أصور فيلم عشان أرجع أقول العالمي واشتغل أفلام كتير أكتر هنا في مصر أو في الوطن العربي ومسلسلات مش هي دي أبدا كده ضحكت على جمهوري وعلى الناس وضحكت على نفسي، بس هو دا السائد ليه؟ الإمكانيات اللي عندهم كده ما يقدرش صعب تحقيق مزيد من ده صعب، أنا بقول الحمد لله والشكر لله أن أنا كل سنة في فيلم ليا ده مجهود غير طبيعي عشان دا يتحقق، لما أبص على زمايالنا بلاقي مثلا ممكن يكون عمل أو عملت فيلم وعشر سنين مفيش فإن أنا أكون في استمرارية 6 أفلام في آخر ست سنين ولا سبعة سنين ده يعني الحمدلله هو ده بقى اللي أنا عايز أوصله.

إيه الصعوبات اللي واجهتك في هوليوود؟

أنا مش عارف ليه دايما بصعبها على نفسي بقى يعني مش عارف ليه أنا دايما بعقدها لنفسي أول عقدة أني إني أطلع العالمية مش لما وصلت وصلت الحمدلله وبدأت أعملت أول فيلم مع نيكولاس كيدج أبقى مبسوط وأكمل أي دور بيجيلي أعمله لا تلاقيني، أنا من صغري بروح لوس أنجلوس وشفت العرب هناك هم نظرتهم لينا عاملة إزاي نظرتهم لينا من منظور المنتجين اللي عايزينا نبان بشكل معين أنا كنت رافض دا تماما، لأن أنا كنت راجل من وأنا صغير بسافر كتير أمريكا فشايف إيه اللي بيحصل في المطارات وفي أوروبا من الافلام ما هو كل بلد وكل منطقة في العالم فيها وحش حلو صح؟ اشمعنا إحنا بس بنبين الوحش، دا أثر فيا أول حاجة اسمي محمد ودي على فكرة أحد الحاجات اللي أساسيا أنا رفضت تغييرها أنا هتلاقي كل أسامي في الأفلام هتلاقي محمد كريم ممكن آه حد يندهلي “مو” لكن أنا رفضت أغير اسمي رغم أن دا اتطلب مني.

View this post on Instagram

A post shared by FilFan.com (@filfan)

وأكمل: "ورفضت وقلت هو ده النظام هوليود عايزاني زي ما أنا أهلا وسهلا فصعبتها على نفسي إزاي؟ إن أنا قلت مش هعمل أدوار اللي بتيجي لأي حد طب دي كارثة لإن إنت 90% بيجي من الأدوار اللي بتجيلنا كلها من خلفية عربية و بتبقى أفلام أدوارها مش لطيفة، آخر همي إني أنا أطلع فيلم أقول الله أكبر وأفجر نفسي، أه في مشروعات كبيرة جدا وهتفرق معايا شخصيا كمحمد كريم الممثل في هوليوود، ويمكن دي أول مرة أقولها كان في مسلسل مهم جدا اتعرض بس مش هقدر أقول اسمه كان مشروع كبير ومخرج ومنتج كبار وكان ليا الحظ جالي تجربة أداء وكان مشهد وجالي الدور قبل أي حاجة أقدمها هناك وبطولة مسلسل بس بيتكلم عن عائلة حاكمة وعنصر غربي في الموضوع وعايزين يعملوا مشاكل في العائلة دي، لما قريت السيناريو قلت أكيد بيتكلموا عن دولة عربية وحكم معين عايزين يوقعوه، الأسماء المشاركة كانت كبيرة، فضلت 10 أيام مش بنام فرصة إني أوصل بسرعة الصاروخ والعالم يتكلم عني وأحقق حلمي، والناحية التانية إني مش هدقر أعمل دا الحمد لله الواحد محبوب في الدول العربية والخليج وبيتمنوا أن حد عربي يحقق حاجة مهمة في هوليوود، فأنا أعمل ليه كده، أنا خسرت مدير أعمالي بسبب العمل دا.

كلمنا عن المشروع الجديد ليك في هوليوود

الفيلم الجديد Dead End فيلم هيتصور ما بين الوطن العربي ولوس أنجلوس وفيه أسماء كبيرة جدا فيه ميجان فوكس وآل باتشينو، وإحنا لسه في مرحلة التحضيرات، ممكن نصور في السعودية وأتمنى أجيبهم للتصوير في مصر، إحنا متأخرين جدا في خطوة تصوير الأعمال الأجنبية في مصر المردود المادي كبير جدا أقل فيلم في هوليوود هيتكلف كام.

هل ممكن محمد كريم يشارك في أعمال مصرية ويحافظ على تواجده في هوليوود؟

أنا آخر 9 سنين كان عندي مهمة التركيز هناك وإني أعمل اسم وعدد من الأفلام، أنا بعمل أفلام مخصوصة للأمريكان زي cowboy دا النجاح ويستاهل إني أبعد فترة، اسمي محمد ومغيرتوش ومصري وبعمل أفلام أمريكان، هو نجاح ضخصي رقم 1 وإني افتح باب لغيري،أنا عملت كل دا بمجهود وشفت المعاناة، ونفسي ألاقي مصريين وعرب في هوليوود من غير معاناة، اللي بعمله هيفتح باب لغيري أنه يقدم أدوار مش بس شخصية العربي.

محمد كريم ونيكولاس كيدج

دلوقتي عندي أفلام ماضيها وعارف مواعيد التصوير أمتى فمش محتاج أقعد السنة كلها هناك، فممكن لو في حاجة كويسة هكون مركز أني أتواجد في الوطن العربي.

مين الفنان المصري اللي شايف أنه يصلح يقدم دور في هوليوود؟

كتير، أنا شايف ناس كتير جدا لأن الجيل الجديد مثقف وعنده لغة في ناس كتير مناسبين جدا أنهم يشاركوا في أعمال في هوليوود.

ليه محمد كريم دايما حريص على حضور المهرجانات؟

أنا حريص على حضور المهرجانات لو فيها شغل ليا، ومش شرط أن يكون عندي فيلم، أغلب الوقت بنكون مشغولين فالمهرجان فرصة نتقابل في مكان واحد، دا مهم جدا المقابلات دي دا اللي بيعمل الصناعة والاستمرارية مش فكرة بس الريد كاربت.

رأيك إيه في فيلم "العملاق" فيلم افتتاح الدورة الخامسة من مهرجان البحر الأحمر السينمائي؟

شفت فيلم "العملاق" جميل جدا أنا أعرف المنتج وموزع الفيلم من أمركيا وبقولهم ألف مبروك، أمير المصري هايل يارب يبقى عندنا ناس كتير في هوليوود هو دا الوقت، إحنا لسنين كتير كان دور العربي بيقدمه ناس من إيران أو باكستان، أنا كذا مرة أروح لتجرة أداء دور عربي، بروح ألاقي 90 % من ناس مش بيعرفوا يتكلموا عربي من الهند وباكستان، يطلبوا مني أكتبلهم الكلام العربي بالحروف الإنجليزي.

اقرأ أيضا:

جولييت بينوش وأوما ثورمان ومي عمر ومحمد سامي من بينهم ... النجوم في فعالية "نساء في السينما" بمهرجان البحر الأحمر السينمائي

مي عمر ومحمد سامي وأروى جودة وزوجها وأمير المصري من بينهم ... مهرجان البحر الأحمر ينطلق بحفل مبهر بحضور النجوم

ياسمين صبري وهنا الزاهد وأسماء جلال من بينهم ... النجوم يتألقون بإطلالات مبهرة في افتتاح مهرجان البحر الأحمر السينمائي الدولي

رومانسية وأناقة ... الصور الرسمية لحفل زفاف أروى جودة

لو فاتك: فن ولا فنكوش - 16 سؤال كل واحد هيجاوب لوحده ... عرفت كام سؤال منهم؟

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5