أحمد عبد العزيز عن واقعة رفضه مصافحة معجب: حملة وراها لجان

نهال ناصر | فى حياة المشاهير

أحمد عبد العزيز

الاثنين , 11 أغسطس 2025 - 12:08 | اخر تحديث: الاثنين , 11 أغسطس 2025 - 12:08

دافع الفنان أحمد عبد العزيز عن نفسه بعد الانتقادات التي وجهت له عقب انتشار فيديو ظهر فيه يرفض مصافحة شاب.

وأوضح أحمد عبد العزيز أن ما يحدث هو حملة ضده من بعض اللجان وقال خلال مداخلة هاتفيه ببرنامج "كلاكيت" مع لينا الطهطاوي: "الحملة دي ملهاش أي أساس من الصحة ولا المنطق لأن ببساطة شديدة الموقف أن أنا داخل أحضر حفلة المهرجان ومتأخر شوية وداخل جري ويبدو أن في أحد الشباب مد إيده علشان يسلم عليا وانا مأخدتش بالي وشفت مجموعة الشباب اللي واقفين قدامي شاورتلهم بدماغي وطلعت في اتجاه الأسانسير، بس فوجئت بهذا الهجوم الشديد والكلام الكتير حوالين أن أنا تجاهلت الولد وكسرت بخاطره وإني مغرور ومتكبر وكلام من هذا القبيل وأكتر من كده أن وصل الأمر إلى حد الكلام غير اللائق وأنا الحقيقة عارف السوشيال ميديا كويس واتكلمت أكتر من مرة عن كيف أنها هتضرنا أكتر ما تفيدنا وأننا معندناش الاستعداد للتعامل مع هذه الوسائل وكنت ناوي اتجاهل الكلام في الموضوع تمام ولكن لأن أنا فنان ولينا جمهوري وبعتز بيه ومتربي معاه وهو متربي معايا يهمني أن أوضح لهم دايما الصورة والحقيقة كما حدثت بالظبط".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابع أحمد عبد العزيز: "الموضوع أخد أكتر من حقه أنا لا أقرأ التعليقات ولا أعيرها أي أهمية لا هي ولا اللجان اللي بتعملها لأنها وراها لجان معينة، في الأول والآخر الموضوع ليس خاص بالفنان أحمد عبد العزيز دا خاص بالفن والفنانين المصريين والموضوع دا ببساطة شديدة ليس في معزل ولا ينفصل عن موضوعات كتير بتحصل حوالينا خاصة بمصر وبتحصل حوالين مصر سواء من خارج مصر أو داخل مصر ودي حاجات اعتقد أن المصريين فاهمينها وحافظينها، أنا كل ما يعنيني أن الجمهور اللي اتبريت معاه يبقى فاهم حقيقة الموقف".

نرشح لك: نادية الجندي تستمتع بأجواء الصيف في أحدث جلسة تصوير من الساحل الشمالي

وأكمل أحمد عبد العزيز: "في محاولات مستميتة للنيل من الفن والفنانين المصريين ودا بدون مبالغة ومسألة واضحة ومفهومة واللي يربط الأحداث ببعض هيلاقي الكلام دا حاصل، إذا كان الشخص صاحب الموضوع الشاب اللي مسلمتش عليه دا جيه في آخر الحفلة واتصور معايا أكتر من صورة وكان مبتسم وسعيد وهو واحد من مجموعة العمل المنظمين للمهرجان فلو الموضوع بالشكل الغريب اللي اتصور إني كسرت بخاطره وأذيته نفسيا مكنش جيه يتصور معايا، الأكتر من دا أنا كان معايا المدام وإحنا خارجين جالها تليفون ابني بيكلمها فأنا مشيت قدامها بشوية وهي ورايا واحد نزل فيديو وكاتب أن في معجبة بتجري وراه".

ووجه أحمد عبد العزيز رسالة لجمهوره قال فيها: "بقول لجمهوري الكلام دا ملوش أساس من الصحة أنا عمري ما أفكر أحرج حد ولا أكسر بخاطر حد وخصوصا من الشباب اللي أنا بحبهم واللي بقول دايما أن مصر تمتلك طاقة من الشباب كبيرة وهما دول قوتنا الاستراتيجية اللي هتحمي مصر لعشرات من السنين وأنا دايما مع الشباب وبحاول اهتم بيه، وبقول للجمهور أنتوا عارفيني كويس مش دي أخلاقي معرفش أعمل كده لا يمكن أرفض أن حد يتصور معايا مهما كانت الظروف أنا متغيرتش ومبقتش مغرور أي نعم أنا الحمد لله عملت مسلسل السنة اللي فاتت كان كويس والكل أشاد بيه وبفتخر إني عملته مع مجموعة من الفنانين الجمال المحترمين على راسهم أحمد العوضي ومن إنتاج شركة سينرجي والشركة المتحدة والحمد لله أن الناس قالت عليا إني كويس هذا لا يدفعني أبدا للغرور دا محصليش زمان حتى لما كانت الشوارع بتفضى لما يتعرض ذئاب الجبل ولا سوق العصر ويتكتب دا في الجرايد مكنش بيأثر فيا معنديش مكان اتغر منه كل ما بنجح أكتر ازداد تواضع أكتر".