حلا شيحة عن فترة خلع الحجاب: الفتنة ممكن أي حد يقع فيها

نهال ناصر | فى حياة المشاهير

حلا شيحة

الاثنين , 7 يوليو 2025 - 16:51 | اخر تحديث: الاثنين , 7 يوليو 2025 - 16:51

تحدثت الفنانة حلا شيحة عن فترة خلعها الحجاب وعودتها للتمثيل ووصفت ما حدث لها بالانتكاسة.

وقالت حلا شيحة في فيديو نشرته عبر قناتها على YouTube: "أي إنسان لو خلى الخوف يتمكن منه بيحصل له في حياته لخبطة جامدة الموازين عنده بتنقلب حاجات كان شايفها فوق تبقى تحت وحاجات كان شايفها تحت بتطلع فوق، ودا اللي حصل معايا انتكاس، فكروا يا جماعة كويس أوي لأن مداخل الشيطان كتيرة ومداخل الشبهات كتيرة ومهما تكون درجة إيمانك قوية كل حد فينا عنده ثغرة جواه، أنا كان بالنسبة ليا الخوف من بكرا بسبب ظروف الحياة وبعض الحاجات في حياتي كانت صعبة سنين بعد الجواز وإحساس الأم اللي عايزة تعمل كل حاجة لأولادها وعايزة تفرحهم وأنهم يكونوا عايشين كويسين وفي حته تليق بيهم، كل الستات دا الجهاد بتاعهم".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

حلا شيحة

وتابعت حلا شيحة: " الفتنة ممكن أي حد يقع فيها، في أمور في الدنيا بتفتنا عن طاعة ربنا ولما بتفتنا مش بنشوف عشان كده هي اسمها فتنة، هي حاجة فيها لخبطة ومغيبة، إحنا مش بنشوف بنفضل ماشيين ورا الحاجة دي زي السراب، الإنسان أحيانا إيمانه بيضعف مش عشان هو مش مؤمن بربنا أو بطل يحب ربنا أو مش بيعمل الطاعات والعبادات لا بالعكس، أنا كنت بعمل كل دا وكنت قريبة من ربنا بس لما الخوف تملكني الخوف من بكرا وحبي الزيادة للولاد بقيت بشوف الحاجة وهي سراب مش موجودة كأن نجاتي هنا، المؤمن بيصاب بتعب نفسي وبلاء واختبار، أنا في الاختبار دا منجحتش".

نرشح لك: فيديو - إدوارد يروي باكيا تفاصيل اكتشاف إصابته بالسرطان: مريت بأسوأ شهور حياتي

وأكملت حلا شيحة: "من كتر التعب النفسي اللي كنت فيه وحاجات خاصة مش هقدر أتكلم فيها، أنا عمري ما كنت أفكر أني ممكن أسيب الجمال اللي كنت فيه مع ربنا سبحانه وتعالى وحبي ليه، كنت بقول أني لو مت هدخل الجنة مش تكبر لكن من كتر ما قلبي كان قريب من ربنا وكنت بلبس نقاب واخترت جوزي بناء على رغبتي أني أكون في الحته دي وحسيته مناسب لديني وقربي من ربنا، في ناس بتتريق على المعاني دي التوبة والانتكاس، متتريقوش دي لغة مذكورة في القرآن الكريم".

وأضافت حلا شيحة: "لما جيت أرجع وحصلي لخبطة الجواز والطلاق واللي كنت فاكرة أنها هتكون عون لي على حياة أفضل ودا طبيعي أي ست من حقها تطلب وتشوف إيه المناسب ليها ولحياتها ولو دا هيساعدها أنها تقرب من ربنا، لما لقيت الموضوع مش صح ومش متظبط وفيه حاجة غلط كانت الصدمة صدمتين لأني شخص حساس وبتعب أوي نفسيا، السنين الأخيرة بعد رجوعي والانتكاسة اللي حصلت في قرارات اتخدت بناء على الضبابية اللي كنت فيها ومكنتش عارفة أنا واقفة فين أنا كنت ماشية لقدام ومش ببص ورايا، مدتش لنفسي الوقت أعالج نفسي من جوا طول الوقت عايزة اشتغل".