محمد محيي يكشف تفاصيل لأول مرة عن مقلب "رامز قرش البحر"

نهال ناصر | فى حياة المشاهير

محمد محيي

الأحد , 27 أبريل 2025 - 15:14 | اخر تحديث: الأحد , 27 أبريل 2025 - 15:14

حكى الفنان محمد محيي كواليس وقوعه ضحية في برنامج "رامز قرش البحر" الذي عرض في رمضان 2014 وما حدث معه.

وقال محمد محيي خلال حواره في بودكاست كريم خطاب: "زعلت من رامز جلال جابني البرنامج أنا مكنتش عارف حاجة عن المقلب لو عارف كنت هزعل ليه؟، أنا كان في كاميرات بتصور على طول لكن بعد الكاميرات جالي انفجار لأني حسيت أن هو مش مقدرني، محصلش عتاب بيبني وبينه بس بعد فترة لقيت قرايبي الصغيرين بيسألوني عن الحوت عمل إيه معاك وهو الحوت بيبلع الناس بجد حسيت لأول مرة أن اللي عملته كان حاجة لطيفة".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابع محمد محيي: "هقول حاجة لأول مرة أنا أساسا سباح وبلعب في نادي الزمالك من وأنا صغير، وكنت بطل جمهورية فلما يحصل حاجة في المايه إن شاء الله خير معنديش قلق من المايه، وإحنا بنصور لما المركب كان بيغرق والبنت بتغرق أنا قاعد بفكر في كل اللي بيحصل إيه دا وإيه الإيد دي فيك ولا حقيقي، أنا مش قلقان أغرق لأ عقلي بيقولي أن أنا في خليج الجونة قرش إيه اللي يطلع، أنا كنت لابس "اللايف جاكيت" عايز أنزل ورا البنت مش عارف أنزل وراها لغاية ما فكيته ونزلت، آخر حاجة شفت البنت حد بيشدها وطلعت فوق لقيت عوامات كبيرة حواليا وأنا صورت قبل كده "ليه بيفكروني" في المايه وعارف انهم بيحطوا بالونة كبيرة عشان الكاميرا متبعدش، لما لقيتها فهمت أنه مقلب".

نرشح لك: يسرا وإسعاد يونس ولبلبة ومحمد إمام فى حفل زفاف ابنة عصام إمام ... أحيا الحفل عمر كمال

محمد محيي من برنامج رامز قرش البحر

وأكمل محمد محيي: "بدأت أعوم وقلت إني كسباح مش هروح للمراكب القريبة هروح للمركب البعيد اللي انا جاي من عنده يعني من 800 لـ كيلو عوم، وقلت مفيش خطر، وأنا نظري ضعيف بلبس عدسات ولما نزلت المايه واحدة وقعت فمبقتش شايف كويس، وأنا ببص ووصلت للمركب وبقولهم نزلولي حاجة، وفجأة شفت من بعيد القرش اللي رامز راكبة وأنا معرفش عنه حاجة ولا عمري شفت شكله، وشايفه عمال يطلع ويغطس قلت دا "قرش" وبقيت مش بعوم بجري في المايه بهستريا لأن بالنسبة ليا دا كان "قرش" وندرت يومها من كتر ما اترعبت إني هعمل أغنية "مدح للنبي" وفعلا بعد ما خلص المقلب عملت الأغنية ونزلتها".

وأوضح محمد محيي أنه أنزعج من ظهوره بهذا الشكل في البرنامج خاصة أنه كان مختفي من فترة ولم يظهر للجمهور، وبعدها كتب منشورا عبر حسابه على Facebook هاجم فيه رامز جلال، مشيرا إلى أنه الآن لا يتم التواصل معه من أجل الظهور في أي برامج من هذه النوعية لأنهم فهموا أنه لا يحب الظهور في هذه البرامج.