إسلام فوزي يرد على اتهامات تنمره على "التيك توكر" شريف نصار: معملتلوش حاجة

نهال ناصر | فى حياة المشاهير

إسلام فوزي وشريف نصار

الأحد , 27 أبريل 2025 - 09:47 | اخر تحديث: الأحد , 27 أبريل 2025 - 09:47

رد صانع المحتوى إسلام فوزي على اتهامات وتعليقات البعض عن تنمره على التيك توكر الراحل شريف نصار.

وظهر إسلام فوزي في فيديو عبر حسابه على "تيك توك": "عندي كلمتين بخصوص شريف نصار الله يرحمه ويغفر له يارب، أنا معرفوش ومعملتش عليه فيديوهات خالص واللي عنده فيديو يجيبهولي، أنا مش عارف ليه من ساعة خبر وفاته امبارح والناس مصرة تلبسني القصة دي أنا معملتش فيديوهات عنه، ومبعوتلي حسبي الله ونعم الوكيل فيك ما أنت تعبت ودخلت المستشفى مش من شوية وربنا بيخلص وأنا معملتش حاجة عن الولد خالص الله يرحمه ومجيتش جنبه تماما على أي اكونت من الأكونتات بتاعتي وفيديوهاته أنا شفتها وسبحان الله ملفتش نظري".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابع إسلام فوزي: "وللمرة المليون فيديوهاتي مش نقد ولا بضايق حد والقصة كلها هزار وروحوا اسألوا الناس متضايقين ولا لأ، بالعكس في بعض الناس بتبعتلي تطلب مني أعمل فيديو على فيديوهاتها".

نرشح لك: صورة- الظهور الأول لبنات كريم محمود عبد العزيز

شريف نصار

واختتم إسلام فوزي كلامه: "في بعض الناس مرضى للأسف وأنا تعبت منهم، متشيلونيش شيلة مش بتاعتي أنا مليش دعوة باللي حصل لشريف دا قدرة وأنا شفت الفيديوهات اللي في الآخر هو كان تعبان والموضوع كان مضايقة، سبحان الله الراجل توفى ويشاء القدر أني أعمل عليه فيديو دلوقتي أخلي الناس تدعيله، ويا جماعة الخير بصفة عامة لو هتكتب تعليق أو هتعمل فيديو عن حد يا تقول كلمة لذيذة تهزر يا تسكت لكن الكلام اللي بيجي على الناس أوي بيبقى صعب وأنا تعرضت له".

@islamfawzy_
معملتش فيديوهات على شريف الله يرحمه بس ربنا اراد انى اعمله فيديو دلوقتى عشان الناس تترحم عليه
♬ original sound - Islam Fawzy

وتوفي التيك توكر شريف نصار صباح الجمعة 25 أبريل، وكان اشتهر بفيديوهات يلقي فيها الشعر، لكن خلال الأسابيع الأخيرة تلقى الكثير من التعليقات السلبية والساخرة.

وكان شريف نصار ظهر في فيديو وجه فيه بعض الرسائل: "الرسالة دي للناس النكرات الذين تعمدوا إحزاني أنا وأهلي عبر منصات التواصل الاجتماعي، مش هقولكم غير جملتين؛ حسبي الله ونعم الوكيل، وأفوض أمري إلى الله، الرسالة الثانية اللي عاوز أوجهها لهؤلاء الأشخاص، إلى كل الذين تورطوا في إحزاني عن عمد، سيسخر الله لكم من يضيق صدوركم ويؤذي قلوبكم ولو بعد حين، واللي أقدر أقوله لنفسي فقط، لا تتعمد إحزان أحد، وقاتل بشرف ولا تمت مقهورا ولا ذليلا، لا تمت إلا محاربا واقفا شامخ الرأس منتصب القامة، عالي المقام".