طه دسوقي يبدي استياؤه من تغطية الإعلام للمناسبات الخاصة: ليه فيه تغطية إعلامية ماشية مع الفنان في مناسباته الشخصية

مي جودة | فى حياة المشاهير

طه دسوقي

السبت , 19 أبريل 2025 - 15:52 | اخر تحديث: السبت , 19 أبريل 2025 - 15:54

عبر الفنان طه دسوقي عن استيائه من وجود تغطية صحفية سواء من مواقع أو صفحات على مواقع التواصل الاجتماعي تهتم بنشر أدق التفاصيل عن النجم سواء في المناسبات الخاصة أو الفنية.

كتب طه دسوقي عبر حسابه بموقع Facebook: "مجرد سؤال
معروف ان الفنان أو العامل في مجال ال (show business ) بيبقى شغله انه بيقدم محتوى وهو الوحيد اللي يقدر يتكلم عنه ويتسأل فيه ويتقبل النقد اللي عليه .. فمفهوم وجود التغطية الإعلامية او التواجد الإعلامي في كل مراحل المحتوى ده .. سواء اثناء تصويره أو أثناء عرضه او أي حاجة تخصه زي المهرجانات وحفلات التكريم والعروض الخاصة .. من إمتى بقى أصبح الفنان "كبني ادم" هو نفسه محتوى ؟؟ .. يعني ليه فيه تغطية إعلامية ماشية مع الفنان ده في مناسباته الشخصية سواء بقى فرح أو عزا والأدهش حتى الدفنة!! وليه يبقى فيه محتوى عنوانه (شاهد فلان بيجوّز بنته.. فلان والدته توفت.. شاهد معازيم فرح فلان.. شاهد إنهيار الفنانة ) ليه والله؟".

طه دسوقي

وتابع: ليه شاهد الفنان وزوجته اثناء حضورهم فرح صديقه؟ ايه المحتوى في بني آدم ماشي في الشارع مع مراته او بيحضروا مناسبة ملهاش اي علاقة بفن ؟ إيه الصحافة في تصوير واحد قاعد بيبكي على حد فقده مش قاعد بيصور مشهد مثلا؟ ايه السبق الصحفي في تصوير جثمان وليه أصلا تصوير جوه المقابر؟؟ طبعا مش كل حد رافع تليفونه بقى صحفي لأن الصحفيين المحترمين مبيعملوش كده.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

واستكمل: ده ياخدنا لسؤال تاني "معلش"، لو نزلت رفعت التليفون صورت واحد قاعد مع مراته على ترابيزة في مطعم هيقوم يكسر عضمك لأنك بالنسباله متحرش أو متطفل .. لكن لو اللي بيتصور ده فنان فاللي بيصوره -وارد يكون صحفي ياعم وانت راجل محبوب وسلم على جمهورك وإعملنا باي وانت بتاكل وقول لمراتك تعملنا باي كمان ولا انت مغرور ولا إيه ياعم من تواضع لله رفعه.

واختتم كاتبا: فسؤالي لأصحابي الصحفيين واساتذتي في مجال الصحافة والإعلام لما ابقى ماشي في الشارع او بحضر مناسبة ملهاش علاقة بالشغل والاقي حد بيصورني ڤيديو اتعامل معاه انه صحفي ولا متحرش؟

يذكر أنه يعرض حاليا لطه دسوقي في دور السينما فيلم "سيكو سيكو" من تأليف محمد الدباح وإخراج عمر المهندس، ويشارك في بطولته كل من عصام عمر، طه دسوقي، علي صبحي، باسم سمرة، خالد الصاوي، تارا عماد، ديانا هشام، وأحمد عبد الحميد.