خاص إنجي المقدم لـ(في الفن): مؤمنة باللي كانت "شادية" بتعمله في "كامل العدد" لكن مبقدرش أنفذه .. ونجاح المسلسل قلل من خوفي

محمد عبد الخالق | فى سينما وتلفزيون

إنجي المقدم في دور (شادية) بمسلسل (كامل العدد ++)

الأربعاء , 26 مارس 2025 - 12:41

الفنانة إنجي المقدم كانت من مفاجآت الجزء الثالث من مسلسل "كامل العدد"، الذي عرض في النصف الأول من رمضان 2025، وحقق دورها نجاحا كبيرا تحدث عنه المشاهدون على مواقع التواصل الاجتماعي.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

الفنانة إنجي المقدم تحدثت لـ(في الفن) في هذا الحوار عن "شادية"، أخت شريف سلامة التي لم يكن يعرفها، الشخصية المميزة جدا، التي تؤمن بالطاقة والروحانيات وتأثير الكلمة على الإنسان، وهي الأشياء التي لم يعتدها الجميع ويرونها غريبة، خاصة عندما يصل الأمر إلى حد المبالغة.

فكرة دخولك كشخصية جديدة على مسلسل ناجح مكنتش مسببة لك قلق؟

طبعا كان فيه نوع من الخوف والقلق، ولكن مشجعاني لأن الـExposure لأني عارفة ومتأكدة أن المسلسل متشاف فده محقق لي حاجة مش مسببة ليا قلق بل على العكس مشجعاني، ولكن الحاجة اللي كانت مسببة ليا قلق هو استقبال الجمهور للشخصية الجديدة "شادية أبو شقرا" وحكمهم عليها، عشان كده كنت بأٌقدمها "ع الشعرة" زي ما هي مكتوبة، وزي ما اتفقت عليها مع المخرج خالد الحلفاوي.

إنجي المقدم مع المخرج خالد الحلفاوي في كواليس مسلس "كامل العدد++"

هل تؤمني وبتصدقي بالكلام الطاقة وتأثيرها والحاجات اللي بتؤمن بيها "شادية"؟ وإالى أي مدى؟

أؤمن بالطاقة جدا، ولكن مش للمدي البعيد زي "شادية"، وعلى فكرة أنا مؤمنة بكل الحاجات اللي قالت عليها "شادية" ولكن هل كل الحاجات دي بانفذها ولا لأ؟، لا طبعا مش كلها، أنا نفسي أقدر مثلا مشربش لبن، لأن اللبن حقيقي مضر، بالرغم من أنه مضر ولكني بحبه فبضطر اشربه، ولكني مؤمنة بكل كلامها الحقيقة.

إنجي المقدم وتمارين اليوجا في أحد مشاهد مسلسل "كامل العدد++"

كلمينا عن كواليس الشغل ... وأصعب المشاهد؟

الكواليس لطيفة ومريحة وسلسة ومنظمة جدا، وهما فريق أشبه بخلية النحل، وكل واحد عارف بيعمل ايه حتى الأطفال الصغيرة، حتى سليم اللي عامل دور "عمر" عمره 4 سنين، عارف بيعمل إيه حبيبي بيمثل، فكلهم ملتزمين شاطرين وموهوبين ولطاف وذوق عيلة فعلا في نفسهم، حقيقي عيلة، ولكن من الحاجات اللي كانت بتبقي صعبة هي المشاهد اللي بيتجمع فيها الكل ولكن حتى في المشاهد دي الأستاذ خالد بصراحة مايسترو، بكل هدوء في المايك بيكلم كل الناس، وكل واحد عارف بيعمل ايه، وبتعدي برضة بسلاسة، الحاجة اللي كانت مقلقة بالنسبة لنا حقيقي الجو، لأن أولا عشان نجمع كل الناس دي في يوم وكل واحد مشغول أو عنده حاجة مكنش سهل ابدا، وفجأة الدنيا تغيم أو مفيش شمس، أو تمطر فاليوم يضرب، ده كان بيخلينا على أعصابنا في المشاهد دي بالذات، غير كده كل الشغل كان سلس ولطيف.

إنجي المقدم في الكواليس مع فريق عمل مسلسل "كامل العدد++"

رأيك في الأطفال المشاركين في المسلسل؟

الأطفال يجننوا ماشاء الله عليهم، كلهم عندهم شخصيات منفردة بيهم، كلهم موهوبين وملتزمين، مهذبين، متربيين جدا، كلهم لطاف حتى مع الضيوف اللي بيجوا اللوكيشن، يعني مثلا صاحب ابني غاوي تمثيل وبيحب "كامل العدد"، وكان عايز مرة يجي اللوكيشن يتفرج، استقبلوه بطريقة لطيفة واحتضونه، ولطاف واتصوروا معاه، هما ولاد يفرحوا وحبيتهم أوي.

إنجي المقدم في الكواليس مع فريق عمل مسلسل "كامل العدد++"

مشهدك مع الطفل "سليم" بتاع (هاتي بوسة) كان منتشر على السوشيال ميديا احكيلنا عن كواليسه؟

فظيع المشهد ده، وهو الولد شاطر، بيتقاله انت هتقول كده لما "ليلي" هتقول إيه، وأول ما نقف هنا بعد الجملة دي مثلا، او مثلا لما "ليلي" تقول لـ"شادية" حاجة هتقولها "هاتي بوسة"، عملها ماشاء الله عليه، وبعدين يكمل المشهد، وعارف هو المشهد أوله امتي وآخره فين، وأنا الصراحة كنت مذهولة بس هو شاطر جدا ماشاء الله عليه.

مشهد "شادية" والطفل "سليم" كان من أكثر المشاهد التي تحدثت عنها السوشيال ميديا

هل كان في مرجع للشخصية أو قابلتي شخصية شبه "شادية" حاولتي تستفيدي منها؟

قابلت ناس كتير، فيه شريحة كبيرة من أصدقائي ومن الناس اللي حواليا ومنهم اللي باروح معاهم Retreats أو الخلوات ومنهم أشخاص قريبين ليا وأهالي أصحاب أولادي، فيه كتير منهم شبه شادية، وقابلتهم كتير في حياتي وعارفاهم كويس اوي، فبالنسبة لي مكنش الموضوع صعب خالص.

قولى لنا 3 من نصائح "شادية" إنجي المقدم مؤمنة بيهم جدا وبتعمل بيهم في حياتها؟

"شادية" ليها نصائح ومعتقدات تبدو كوميدية بس هي حقيقية جدا واكتر 3 نصائح أنا مؤمنة بيهم هم:

1- "مبنقولش لجسمنا سننا"، لأن الكلمة لها طاقة، فلما بتقولي مثلا أنا تعبانة أو عيانة فعلا فعلا جسمك بيصدق، وبيبقي تعبان جدا، فدي فعلا حقيقية وأنا مؤمنة بيها جدا، أنا مش هاقول خالص، أنا هنسي الرقم وامسحه من الذاكرة.

2- متفقة معاها في الـAffirmations (التأكيدات)، إني أقول لنفسي أنا جميلة وقوية، لأن برضة الكلمة لها طاقة فعلا، واللي بتقوليه بيتصدق.

3- "سيبي لبن البقرة لأولادها"، آه أنا مؤمنة بيها لأنها مش كويسة لجسمنا، إحنا جسمنا المفروض يشرب لبن المعزة مش البقرة.

إنجي المقدم في "كامل العدد++"

طيب إيه مش متفقة معاها فيه؟

لكن اللي مكنتش متفقة معاه فيه خالص إنها أخدت "الفرير" والملابس الجلد ورميتها.

اقرأ أيضا:

نسرين طافش تتألق بالقفطان الأحمر في أحدث ظهور

مصطفى عماد لـ"في الفن": بدأت التحضير لـ "آسر" في "سيد الناس" من 5 شهور وإشادة أهالي أطفال مصابين بالتوحد أسعدتني ومحمد سامي بيقدر الممثل الشاطر

خاص غادة طلعت لـ"في الفن": "ابتسام" في "قهوة المحطة" شخصية مش سهلة واتشمت من الأمهات بسبب "قلبي ومفتاحه"

32 ولا 38 … خلاف بين "شاهد" وWatch It على عمر دنيا سمير غانم في "عايشة الدور"

لا يفوتك: في الفن يكشف حقيقة وليد فواز مبدع أدوار الشر

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5