خاص كريم آدم ينهي الجدل حول بوسترات "لام شمسية: تفسيرات الجمهور فاجئتني بس مش كلها صح ... لسه في أسرار مخفية وتصميمها استغرق 3 شهور

نهال ناصر | فى سينما وتلفزيون

كريم آدم

الثلاثاء , 25 مارس 2025 - 10:03 | اخر تحديث: الثلاثاء , 25 مارس 2025 - 20:03

"الجواب بيبان من عنوانه" مقولة دائما ما نرددها وهذا العام في رمضان 2025 هذه المقولة تنطبق على بوسترات مسلسل "لام مشسية".

مع بداية النصف الثاني من شهر رمضان الكريم وعرض أول حلقة من مسلسل "لام شمسية" بدأت حالة الجدل حول المسلسل، ثم بدأ الجمهور يركز في تفاصيل بوسترات شخصيات المسلسل، فهي لم تكن مجرد بوسترات عادية كل شخصية نرى خلفها رموز بدأ الجمهور يفسرها ويكتشف من خلالها الشخصيات.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

لذا تواصل FilFan.com مع مصمم البوسترات كريم آدم ليحدثنا عن مراحل تنفيذ البوستر وكيف جاءت فكرته، وهل تحليلات الجمهور صحيحة أم لا.

نرشح لك: ياسمين صبري تتعرض لموقف محرج مع محمد رمضان في حفل سحور "ميديا هب": ابنك! إنت مجنونة!

كان في كلام كتير على بوسترات المسلسلات السنة دي أنها تقليدية، لكن مع طرح بوسترات "لام شمسية" الكل أجمع أنها مختلفة، شفت تعليقات الجمهور إزاي؟

كنت سعيد جدا بتعليقات الجمهور ومبسوط مش عشان البوسترات عجبت الناس على قد نجاح المسلسل نفسه عشان أنا شايف أنه مهم جدا لكل بيت التوعية بموضوع دا حاجة مهمة ومتعملتش قبل كده في العالم العربي بشكل شبه اللي بيحصل، كنت مبسوط أن في بوستر عليه حالة نقاش.

بوسترات مسلسل لام شمسية

تصميم البوستر وفكرته هل كانت فكرتك بعد ما عرفت قصة المسلسل ولا فكرة المخرج كريم الشناوي؟

البوستر فكرتي الأول لما المخرج كريم الشناوي حكالي على المسلسل وحبيت إني أكون جزء من المشروع دا بعد كده قرأت السيناريو وعجبني جدا وعرفت تاريخ الشخصيات واتفرجت على أجزاء من المسلسل، بدأت اشتغل وكانت الصعوبة أن موضوع حساس شبه دا ممكن إزاي نترجمة في بوستر، الأفكار الأولى كانت كلها حاجات ممكن تكون جارحة للعين فكان التعامل صعب لازم يبقى بذكاء، زي ما المسلسل مكنش في مشاهد تجرح العين بس وصل الفكرة، لازم البوستر استخدم نفس الطريقة.

بوسترات مسلسل لام شمسية

فكرت أن الموضوع عن الأطفال وجارح حبيت أني استخدم حاجات رمزية تقول ولكن من غير ما تخليك تشوف حاجة تضايقك، لما قريت تاريخ الشخصيات حسيت أن كل شخصية دماغها محبوسة في سجن خاص وبيتعامل بيها لوحدة، من هنا جت فكرة القفص أن كل واحد من أبطال العمل فوق دماغه قفص محبوس جواه، وحبيت أكسر التابوه بتاع فكرة أن البوستر الفردي يكون بنفس الخلفية، قلت للمخرج كريم الشناوي الفكرة وعجبته أن كل خلفية للبوستر الفردي تكون حسب الشخصية هي مرهقة أكتر لكن دا اللي عجب الناس وخلاهم يربطوا الشخصيات.

الجمهور قدم تحليلات لبوسترات كل فنان وشايف أن الرسومات اللي في خلفية كل فنان بتعبر عن حالته النفسية وتركيبة شخصيته، الجمهور عرف يقرأ البوسترات ولا مش ده المقصود؟

مش كل التوقعات صح في توقعات صح وفي توقعات أنا عاملها أنها تتفهم بكذا معنى عشان محرقش أحداث المسلسل لكن لما المسلسل يخلص الناس هتبدأ تربط القصة بشكل مختلف شوية، هي معمولة عشان الناس تتناقش وتتوقع فالمسلسل يتشاف أكتر.

بوسترات مسلسل لام شمسية

استغرقت وقت قد ايه لحد ما لقيت الفكرة المبتكرة دي؟ واستغرقت وقت قد إيه لتنفيذها؟

الشغل على البوستر أخد 3 شهور منهم شهرين تجارب وشهر كان فيه التنفيذ، أنا اشتغلت كمان على كل خلفية لاسم الحلقات ودا اقتراح مني، أن اسم كل حلقة ميبقاش مكتوب على خلفية عادية لا استخدم رموز في أسماء الحلقات خاصة أنها مميزة كلها كلمة واحدة وبتبدأ بلام شمسية فحبيت أكمل اللوحة الجميلة اللي هما عاملينها.

بوسترات مسلسل لام شمسية

قبل "لام شمسية" والنجاح الكبير، كلمنا عن أعمالك اللي قدمتها؟

آخر أعمال كان بوستر فيلم "البحث عن منفذ لخروج السيد رامبو" وعملت بوسترات "خلصانة بشياكة" و"أهو دا اللي صار" و "ما وراء الطبيعة" و"بالحجم العائلي" وغيرها، وكنت مسئول عن تصميم البوستر والمطبوعات في مهرجان القاهرة السينمائي الدولي في الدورة 36 بوستر نادية لطفي وبفتخر بالموضوع دا لأني وقتها كان سني صغير كنت أصغر مصمم للبوستر في تاريخ المهرجان في الوقت دا، أما الجديد فيلم شغال عليه لكن مش هقدر أقول تفاصيله.