خاص محمد ثروت لـ"في الفن": التمثيل بالفصحى في "سكر" ممتع جدا وكنت زي العيال الصغيرة في الكواليس ورعبت ماجدة زكي بالأسد

محمد عبد الخالق - جدة | فى سينما وتلفزيون

محمد ثروت

الأحد , 8 ديسمبر 2024 - 15:37 | اخر تحديث: الأحد , 8 ديسمبر 2024 - 15:37

ضمن الأفلام التي تعرض هذا العام في الدورة الرابعة من مهرجان البحر الأحمر السينمائي، يعرض الجزء الثاني من الفيلم الغنائي الموجه للعائلة "سكر".

واحد من أبطال الفيلم هو الفنان محمد ثروت الذي التقى به FilFan.com على هامش مشاركته في المهرجان، ليحدثنا عن تجربته مع "سكر".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

حدثنا عن تجربتك مع فيلم "سكر"

تجربتي في فيلم "سكر" تجربة لذيذة كنت مبسوط بيها، هو موجه للعائلة والطفل في إطار الاستعراضات والغناء، بقم دور"بلالايكا" هو العامل في ملجأ الأطفال اللي بيعمل كل حاجة هو الطباخ والنجار والسباك، هو زي أخوهم الكبير وحنين عليهم، أنا بحب الشغل مع الطفل رغم أنه صعب لأن الأطفال معندهمش قواعد هما موهبتهم فطرية والتمثيل معاهم بيرجعني لفكرة الهواية، كان في كيميا بيني وبين الأطفال.

نرشح لك: محمد رمضان يرد على انتقادات تقليده لـ أنور السادات في كليب "جوانا" … كشف عن رأي عائلة الرئيس الراحل

محمد ثروت من فيلم سكر

ماذا عن التعاون مع الفنانة الكوميدية ماجدة زكي

أستاذة ماجدة زكي جميلة عبقرية سعيد إني اشتغلت معاها والكواليس كانت جميلة، أستاذ تامر المهدي المخرج عامل شغل حلو والمؤلفة هبة مشاري حمادة كاتبة فيلم جميل ومليء بالمشاعر وسعيد أن العمل باللغة العربية لأنه بيثبت فكرة أن الطفل لازم يعرف اللغة العربية الأم ولازم يحبها لأنها لغة الوطن العربي كله.

هل واجهت أي صعوبات خلال التمثيل باللغة العربية في "سكر"؟

التمثيل باللغة العربية ممتع جدا، أنا كنت شاطر في العربي والنحو، وكان معانا مصحح اللغة العربية وكان شاطر جدا، مش كل الناس عارفة النحو وتشكيل الجملة وكان لازم يكون موجود عشان نطق الجملة صح، أنا بحب اللغة العربية جدا هي لغتنا، طبعا اللهجة المصرية معروفة في الوطن العربي كله، لكن دي لغتنا الأم وأننا نحطها في عمل يمس الطفل ويساعده أنه يحبها دا شيء مهم.

بوستر فيلم سكر

الفيلم يعتمد على الاستعراضات والحوار الغنائية، هل واجهتك أي صعوبة في ذلك؟

كان في بروفات كتير جدا على الاستعراضات وخلال التصوير صورنا أكتر من مرة عشان ناخد أفضل مشهد، وإحنا بنسجل الأغاني كنا بنحاول نطلع أعلى جودة، كل دا سهل علينا وقت التصوير.

أحكي لنا عن مواقف لا تنساها في كواليس فيلم "سكر"

في الكواليس كنت زي العيال الصغيرة أغلب الممثلين أطفال وأنا جوايا طفل، أسعد أوقاتي لما بلعب مع الأولاد، في يوم أستاذ تامر قال في أسد في التصوير، أنا قلت لأستاذة ماجدة زكي أن شركة الإنتاج جابوا أسد حقيقي عشان المصداقية، فهي عشان فنانة جميلة وقلبها أبيض صدقت وكل شوية كنت بخوفها.

فيلم سكر

وبعيدا عن "سكر" تشارك في مسلسل "موعد مع الماضي" حدثنا عنه

أنا مبسوط بتجربة العمل مع كمية من النجوم في مسلسل "موعد مع الماضي" مسلسل كبير وضخم أتاح لي إني اشتغل مع نجوم، والمخرج السدير مسعود شافني بطريقة تانية غير الكوميدي ومحمد العربي عامل مسلسل مختلف فيه إثارة ودراما، أنا بقدم شخصية "فتلة "مع آسر ياسين طول الوقت هو صديق البطل دور جديد عليا وسعيد بيه.

كيف يختار محمد ثروت أعماله هل هناك معايير محددة تضعها؟

الفكرة في الدور، لو هيقدم لي جديد أو مش هيقدم جديد، يكون الدور نفسه أنا معملتوش قبل كده، لما بيكون دور مختلف بوافق على طول، وطبعا المخرج وفريق العمل.

هل بدأ محمد ثروت في التفكير بالبطولة المطلقة؟

البطولة المطلقة مينفعش الواحد يطلبها مش هقول أنا عايز أعمل فيلم هي بتترمي عليك، الجمهور أو شركات الإنتاج بيحس ان إنت حجمك مش مستحمل تبقي دور تاني، وأنا مش مستعجل عليها.