خاص دياموند بو عبود لـ"في الفن": بطلة أرزة تشبه كل نساء العالم واتعرضت لإصابات في الفيلم لهذا السبب واتجاهي للكتابة جزء من رؤيتي الإبداعية للتمثيل

نرمين حلمي | فى سينما وتلفزيون

دياموند بو عبود

الجمعة , 15 نوفمبر 2024 - 11:56 | اخر تحديث: الجمعة , 15 نوفمبر 2024 - 11:56

نجاح كبير تحققه النجمة دياموند بو عبود، بفيلمها الجديد "أرزة" المشارك في مسابقة "آفاق للسينما العربية"، بعد مشاركته في عدة مهرجانات عالمية وتحقيقه إنجاز كبير منذ عدة أيام حيث اختارته لجنة ترشيح الفيلم الذي سيمثل لبنان في مسألة الأوسكار لأفضل فيلم أجنبي لتمثيل لبنان.

FilFan.com التقى بالفنانة اللبنانية دياموند بو عبود، للحديث عن كواليس فيلم "أرزة" وأحدث أعمالها الدرامية، وتفاصيل التعاون مع زوجها الفنان هاني عادل في الفيلم، فضلاً عن تجربتها في التأليف بجانب التمثيل.

احتفاء عالمي كبير بفيلم "أرزة" قبل مشاركته في مهرجان القاهرة السينمائي في دورته 45، وترشيحه للأوسكار بيمثلك إيه؟

مبسوطة جدًا إنه الفيلم لف العالم، من هذه البلدة الصغيرة، يروح للعالم كله حامل قصة البلد هذه "الأرزة"، ويحكيها للعالم كله، على فكرة "أرزة" تشبه نساء من مصر والصين، مش بس المرأة العربية لكن نساء من العالم كله، و"أرزة" تجمع كل الناس دي، فمبسوطة كتير إن بعد جولته بالعالم يجي على مصر ومهرجان القاهرة السينمائي، وانبسطت كتير إنه لبنان اختار "أرزة" لتمثيله في سباق الأوسكار وإن شالله بيوصل للمراحل النهائية لأفضل فيلم أجنبي، هيك يمثل بصيص أمل رغم كل الأشياء الصعبة اللي عم تصير اليوم، إن شالله هيك الصوت يوصل للعالم كله، تعرفي إن الإنسان لما يكون بضيقة ويحس إنه في إنسان عم يحكي عنه، هيك يحس إنه شوية مش لوحده.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

المخرجة ميرا شعيب قالت لنا إنك بكيتي أول ما قريتي سيناريو فيلم "أرزة" ووقتها عرفت إنك إكيد هتوافقي على بطولته.. ليه اتأثرتي؟

حصل فعلاً لأنه حسيت إنها امرأة حقيقية، وقد إيه شخصية بعرفها وبحبها وقريبة مننا في المجتمع، هذه المرأة اللبنانية المناضلة اللي نفتخر فيها وبنحبها، اللي بتتحدى كل الظروف الصعبة، وتظل عنيدة في قوتها وإصرارها على الحياة، وتشتغل وتعيش من عرق جبينها، ما بتساوم على قناعتها ومبادئها وتتقدم لقدام وهي رأسها عالية رغم كل شئ ومأمنة بقضيتها وحياتها ولا تتركها وتهرب، فكتير اتأثرت لما قريت السيناريو وشكرتهم على الثقة الكبيرة في اختياري للدور وكنت حريصة عليه وبحترم الشخصية، بحب واحترم ميرا شعيب جدًا وبحترم الفيلم ومؤلفيه لؤي خريش وفيصل سام شعيب، كتبوه بشكل كتير حلو وذكي وفيه طرافة وبساطة؛ بيطرح قصص كتير في نفس الوقت.

فيلم أرزة

وصحيح اتعرضتي لإصابات في التصوير وكسر إيدك؟

لا، كان في رجلي واتعرضت لإصابات مرتين فعلاً؛ الأولى في أول يوم تصوير وقعت وطلبوا نوقف التصوير حرصًا على راحتي، لكن أنا رفضت وصممت نستكمل التصوير عادي، أنا بحب الالتزام جدًا في التصوير واتعلقت بالشخصية، وتاني إصابة كانت في آخر يوم برضو، في مشهد بالفيلم البطلة واقفة وحد يجي ياخد منها حاجة ويمشي كده، فأنا مسكت الحاجة مش عايزاه ياخدها ونسيت فوقعت في الأرض ومشيت وراه كده في الأرض.

بتتقمصي الشخصية بطلة الفيلم بدرجة كبيرة؟

لا، مش بتفق مع "Method Acting" في التصوير، بمعني إني مش بنسى، أنا بشوفها لعبة بلعبها وبصدقها وانبسط بيها وتديني حاجات حلوة وأديها حاجات حلوة، بس هي في الأول والأخر لعبة مش بصدقها واتوه عن الحقيقة لاء، فكملت التصوير عادي وقتها رغم الإصابة بالعكس كنت مبسوطة وأنا كل يوم أنزل واروح واشتغل.

وإيه الحاجة الحلوة اللي اخدتيها وتأثرتي بيها من بطلة فيلم "أرزة"؟

اخدت منها واديتها، اتفقنا على القوة، مش غلط الواحد يضعف أوقات ويرجع يقف ويكمل ويختار ويصر على الحياة، وياخد من الضعف قوة، ويآمن بقضيته والحياة ويكون شجاع، والعند في الإصرار وما يساوم على حقه اللي هو ملكه.

بتتكلمي بلهجات مختلفة في فيلم "أرزة".. واجهتي صعوبة في إتقانها؟

هي بنعتبرها في بيروت لكنات مختلفة عكس مصر يمكن بتسموها لهجة، هي عندنا كلها لبناني لكن بتخلف بالمناطق، البطلة في الفيلم بتتنقل وتتنكر بنفس طريقة المكان اللي بتكون فيه عشان تحسسهم إنها منهم وزيهم، فبتتكلم بلكنات مختلفة؛ واتدربت عليهم كتير في الكواليس فانبسطت بالتجربة جدًا.

بطلة "أرزة" واقعية وإطلالتها بسيطة جدًا وظهرت في الفيلم بدون مكياج (مستحضرات تجميلية)، هل أزعجتك؟

لا بالعكس، هي لازم تطلع كده، كنت حريصة على ظهورها كده، هي "أرزة" شخصية لازم تظهر كده.

دياموند بو عبود من فيلم أرزة

بتفضلي السينما الواقعية أكتر من أفلام الفانتازيا والخيال؟

لا، كل حاجة ليها دورها ومكانتها؛ لكن فيلم "أرزة" ينتمي للواقعة الجديدة New Realism والمهم الممثل لازم يفهم السياق context الإطار اللي ماشي فيه، مينفعش تكون ماشي بطريقة تانية غير الفيلم، لازم تفهم بذكاء ويكون عندك approach للشخصية طريقة التمثيل للشخصية وإزاي بتتحرك وتتصرف وتتعامل وإزاي كل حاجة، لو فيلم بينتمي لنمط تاني هيكون طريقة التمثيل مختلفة برضو، هتوصل للناس بلغة سينمائية مختلفة، يعني كل فيلم له لغة سينمائية مختلفة، يعني إذا بترجعي بتاريخ السينما، عندك السينما السيريالية والواقعية والواقعية الجديدة، في أنماط كتير بكل الفنون، كممثل لازم تفهم الإطار وبيئة الشخصية، وأنا بدرسه للطلبة عندي.

زوجك الفنان هاني عادل شاركك في فيلم "أرزة" بوضع الموسيقى التصويرية للفيلم.. إحكي لنا عن الكواليس بينكم؟

هاني قرأ السيناريو وشاف الفيلم قبلي بعد التصوير عشان يعمل المزيكا، حب الفيلم جدًا وperformance أدائي جدًا واتحمس أوي وكان حريص يقدم مزيكا شبه الفيلم جدًا وطالعة من الشارع اللبناني، فعمل بحث كبير ورجع للموسيقى السبعينيات في لبنان والأغاني اللبنانية واشتغل عليها بشكل كبير وهو فاهم "أرزة" كتير والشخصية وأبعادها فتحسها مزيكا لها دور وماشية مع الشخصية من الأول الفيلم لأخره، مش مجرد موسيقى حلوة في الفيلم.

فيلم "أرزة" مش التعاون الفني الأول بينكم.. شاركتيه قيل كده في أغنيته الجديدة وفرقة "وسط البلد" "ع الوعد" كانت من فكرتك.. إيه حمسك وقتها للكتابة؟

بالصدفة كنت معاهم في الاستوديو، فجات لي الفكرة فاخدت ورقة وقلم وكتبت شعر نثري كتابة سريعة باللهجة اللبنانية وقريته لهم فحبوها جدًا وكلموا الشاعر عمار مصطفى وأعاد كتابتها باللهجة المصرية وظهرت بالنسخة الأخيرة اللي سمعتوها في الأخر دي.

بتحبي تاخدي رأي هاني عادل في اختياراتك لأعمالك الفنية؟

أيوة طبعًا إحنا دايمًا بنتكلم في كل حاجة وأثق في رأيه جدًا، وهو كمان بنحب نتناقش في كل حاجة، نسأل رأي بعض ونثق فيه، هو أول حد دايمًا بسأله في كل حاجة.

من عند حكايات التأليف، نرجع لتجربتك في فيلم "وينن" شاركتي في تأليفه، هل ممكن تكرري تجربة تأليف فيلم أو بتفكري تتوجهي لمجال التأليف؟

أنا بحب الكتابة جدًا من زمان، بكتب من منطلق إني ممثلة، يعني بكتب بطريقة معينة دايمًا يعني بشوف من منظار تاني، عندي حاجات كتير مكتوبة، وبالفعل شاركت في تأليفه كفيلم روائي طويل مع المؤلفين جورج خباز ونيكولا خباز، وقبله فيلم قصير صامت اسمه "نقطة فاصلة" اتعرض واخد جايزة زمان وأنا صغيرة، وليا تجارب في الكتابة المسرحية برضو، واحدة اتعرضت زمان ومسرحية جديدة غيرها اتعرضت في ديسمبر 2023 في فرنسا، أنا مثلت فيها وشاركت في "creation" الكتابة الإبداعية مع ابنة مخرجة لبنانية عايشة في فرنسا.

مؤخرًا شاركتي في مسلسل "The Board" مع منصة "أمازون" الرقمية العالمية.. شوفتي التجربة إزاي؟

انبسطت بالتجربة جدًا، أول تعاون ليا معاهم، تجربة جديدة وحلوة كتير، وصورنا في "أبو ظبي" مع ممثلين كتير بحترمهم جدًا، والتأليف والإخراج لهوزان عكو حلو جدًا.

بعد فيلم "أرزة".. بتنشغلي بتحضير إيه سينما أو دراما أو مسرح الفترة الجاية؟

مسلسل "سراب" مع هاني عادل، بس متقابلناش في المشاهد للأسف، وهو بطولة أستاذ خالد النبوي، ويسرا اللوزي وناس حلوة كتير هتشفوها في المسلسل، والإنتاج لشركة S.Productions والإخراج لأستاذ أحمد خالد، وهو أول إنتاج Original أصلي لمنصة رقمية اسمها "TOD".

اقرأ أيضا:

#شرطة_الموضة: لقاء الخميسي تعيد ارتداء فستان ظهرت به من قبل هيدي كرم ... سعره يصل لـ100 ألف جنيه

بوسي تلفت الأنظار بـ"جمبسوت" أسود في أحدث ظهور

حملوها على الأعناق ... نانسي عجرم تتألق بإطلالتين في عرض أزياء إيلي صعب بالرياض

أحمد عز في ندوته بمهرجان القاهرة السينمائي: نفسي أعمل شخصية طارق بن زياد وخالد بن الوليد .. "ولاد رزق" مكنش فيلمي

لا يفوتك: في الفن يكشف حقيقة وليد فواز مبدع أدوار الشر

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5