محمود شاهين: كان في بار للخمور في فرحي وعلاقتي بربنا خط أحمر

نهال ناصر | فى حياة المشاهير

محمود شاهين وزوجته

الجمعة , 18 أكتوبر 2024 - 14:02 | اخر تحديث: الجمعة , 18 أكتوبر 2024 - 17:48

رد مدير التصوير محمود شاهين، ابن شقيق الفنانة إلهام شاهين، على الانتقادات التي وجهت له بسبب حفل زفافه، ورقصه مع بعض الفتيات وشرب الخمور.

وقال محمود شاهين في لقائه مع ياسمين الخطيب ببرنامج "شاي بالياسمين": "البنات اللي كنت برقص معاهم في الفرح أصحابي جدا ومن أكثر الناس القريبين في الحياة وأزواجهم كانوا موجودين وأصحابي ومتربين معايا، ولما بدأت الفرح بفتح إزازة "شامبانيا" في كذا فرح عملوها بعدي، أنا دايما بتفرج على حاجات برا مصر، بحب مثلا الرالي و"الفورميلا وان" ودايما احتفالهم بالشامبانيا، حد جبهالي وفتحناها ودا بالنسبة لينا انبساط".

تابعوا قناة FilFan.com على الواتساب لمعرفة أحدث أخبار النجوم وجيدهم في السينما والتليفزيون اضغط هنا

محمود شاهين

وتابع محمود شاهين: "كان في أوبن بار للخمور في الفرح، هنكر ليه إيه اللي يخليني أنكر شيء موجود في أفراحنا كلنا موجود في أفراح أغلبية أصحابي وكل الناس، موجود في جزء كبير من الناس اللي بعيش معاهم، أنا مش هقدر أجي أقنعك بأفكار، زي ما في ناس فكروا في "لولو" إلهام صفي الدين وقالوا إزاي بنت عمته تبوسه، أنا بالنسبة ليا دي أختي إحنا في العيلة بنصحى كلنا من النوم بنبوس بعض، في ناس بالنسبة ليهم أنت إزاي تبوس بنت عمتك؟ في ناس تقولك منعملش في الفرح خمرة، أنا كاتب في دعوة فرحي اللي عايز يجيب الازازة معاه يجيب والناس كلها كنت بتشرب، أنا مش بحكم على حد كل واحد ينبسط بطريقته".

نرشح لك: محمود شاهين: إلهام شاهين ربتنا على الدين واحترام الآخر

محمود شاهين وزوجته وإلهام صفي الدين

وأكمل محمود شاهين: "محصلش أي تجاوز جوا الفرح لأن أغلب الناس تعرف بعض دا كان فرح معمول للأصحاب والعيلة، مكنش في حد معزوم من الصحافة، وأنا مش مبسوط بفكرة التريند، أنا نمت صحيت لقيت نفسي تريند ومش أنا اللي عامله، ومحدش عارف مين اللي نزل الفيديوهات، فجأة بقى عندنا ناس جوا الفرح ومش عارفين مين دول، وحصل مشكلة في آخر الفرح واحد عمال يصور وجري، الفرح اتعمل جوا البيت".

محمود شاهين مع عائلته

واختتم محمود شاهين كلامه: "اللي صور إحنا مش مستخبين دا أنا في فرحي، يعني مبدأي إني مش شايف إني بعمل حاجة غلط وإني مبسوط والعروسة مبسوطة ومكناش متخيلين أن الفرح هيطلع بالجمال دا، الناس بتحكم بفيديو ومحدش عارف حياتي فيها إيه، أنا بعمل شيء يبقى بعمله مش هخاف من حد أكتر من ربنا، علاقتي بربنا محدش ليه دعوة بيها دا خط أحمر، دي حاجة بيني وبين ربنا ومفيش بني آدم ليه حق يحكم".