محمود سعد عن واقعة شهد سعيد: إحنا ولاد حواري وعارفين إن الرياضة أخلاق

مي جودة | فى حياة المشاهير

محمود سعد

الخميس , 11 يوليو 2024 - 22:03 | اخر تحديث: الخميس , 11 يوليو 2024 - 22:10

علق الإعلامي محمود سعد على واقعة لاعبة الدراجات شهد سعيد وتعمدها لإصابة اللاعبة جنة عليوة، خلال منافسات بطولة الجمهورية بالسويس للدراجات، وبعد ذلك تأهل الأولى لأوليمبياد باريس رغم إيقافها عاما محليا.

قال محمود سعد في فيديو نشره عبر قناته بموقع Facebook: "أنا بس تخيلت أن البنت جنة عليوة دي بنتنا، وحصل لها اللي حصل لها، الصورة بتتكلم، وبعد شهرين البنت اللي ضربتها دي موجودة في فرنسا في الأوليمبياد بتمثل مصر، تحت شعار (أصل في أولويات، واحنا عاقبناها محليا)، أنا مش عراف احنا بنعمل ايه في الناس، أنا تخيلت نفسي مطرح جنة دي وشوفت شهد سعيد وهي مسافرة في بطولة عالمية واحنا قاعدين نتفرج كدة وبنتي اتدغدغت تحت شعار أولويات، لو بطلة العالم في البطلة بتاعتها، أنا كمسئول أقول لا مش هتسافر، لأن الخبر دا لو اتذاع هناك هتبقى فضيحة بجلاجل".

وتابع: من واحنا اد كدة، واحنا ولاد حواري، مش ولاد أحياء راقية ونوادي الجزيرة، مع كل التقدير، عارفين ان الرياضة أخلاق، ولا بقت حاجة تانية وغيروها وبقت المكاسب الأول والميداليات الأول! بنت ضربت بنت متعمدة، حسب الصورة، والدليل إن الاتحاد عاقبها، معناه أنه اخطأت في جزء أخلاقي، وأهل شهد كان لازم يسعوا أن بنتكم تتعاقب، لأنكم لما تسيبوا بنتكم تعمل كدة وتكسب مظنش إن دي حاجة تبسطكم، كدة التربية فيها مشكلة، تعالوا نقول إن الحياة ليست لمن يجرؤ، بل للأقوى وصاحب القوة والنفوذ، قولوا لنا عشان مانبقاش بنقول كلام أهبل على القيم والأخلاق، وقولوا لنا يإما نسكت ونشرب من البحر يإما نتعامل مع الزمن اللي بقى لا فيه مباديء ولا قيم، مش فاهم ومش قادر أفهم.

محمود سعد

واستكمل محمود سعد: هل أهل شهد فرحانين بسفر بنتهم ودي حاجة تسعدهم؟ لو تسعدهم دي فيها مشكلة، لكن رئيس الاتحاد مكنش موفق في اختيار جملة "في أولويات"، إن كان هو قاله بالفعل.

وكانت وزارة الشباب والرياضة أرسلت خطابا للجنة الأولمبية المصرية لإعادة دراسة موقف مشاركة اللاعبة شهد سعيد والإجراءات التي قام بها الاتحاد في هذا الشأن، طالبة موافاتها بتقرير تفصيلي، وفقاً للوائح المحلية والدولية المرتبطة في هذا الشأن ومراعاة لكل المواثيق والمعايير الرياضية الدولية وأخذا بعين الاعتبار القواعد الأخلاقية الحاكمة للمنظومة الرياضية.

محمود سعد

وذلك بعدما تناول النشطاء عبر مختلف مواقع التواصل الاجتماعي منشورات عن واقعة تعمد اللاعبة إصابة إحدى اللاعبات أثناء منافسات بطولة الجمهورية بالسويس، وقيام الاتحاد بإيقافها لمدة عام وتوقيع غرامة مالية عليها.