سلمى أبو ضيف: وقفت في قفص المحكمة 9 ساعات بمسلسل أعلى نسبة مشاهدة.. وقصة حبي حصلت صدفة

FilFan.com | فى حياة المشاهير

سلمى أبو ضيف

السبت , 29 يونيو 2024 - 20:22 | اخر تحديث: السبت , 29 يونيو 2024 - 20:24

حلت الفنانة سلمى أبو ضيف ضيفة في برنامج ضيفي للإعلامي معتز الدمرداش، وتحدثت سلمى عن كواليس شخصية شيماء التي جسدتها في مسلسل "أعلى نسبة مشاهدة"، وعن بدايتها في الفن ودخولها للعالم الموضة والأزياء، وعن آخر خطواتها وهي الزواج من رجل الأعمال إدريس عبد العزيز.

وقالت سلمى أبو ضيف خلال البرنامج، إن فيلم أنف وثلاث عيون كان نقطة تحول لها في السينما، ومسلسل أعلى نسبة مشاهدة نقطة هامة جدًا في حياتها.

سلمى أبو ضيف

وأضافت سلمى عن كواليس مسلسل أعلى نسبة مشاهدة، أن الضرب في العمل كان حقيقي سواء من الفنان محمد محمود الذي جسد دور والدها أو زوجها الذي جسد دوره الفنان أحمد الرافعي، مضيفة: كنا بنصور في محكمة حقيقية والسجن ده حقيقي مش ديكور، وقعدنا في القفص 9 ساعات والمخرجة ياسمين كامل قالتلي هتفضلي واقفة جوا القفص.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

واستكملت حديثها عن شخصية شيماء، قائلة: مسلسل أعلى نسبة مشاهدة كان تجربة لذيذة بس موترة، واستمتعت جدًا أني قعدت مع عيلة من الحطابة وعملت معايشة.

وعن اختيارها لأدوارها، أوضحت سلمى: الهدف بتاعي أعمل الحاجات اللي أنا حابها ولما حد من المقربين ليا سواء أهلي أو صحابي يشوفها مبقاش مكسوفة من نفسي وأنا بتفرج، وبختار الأدوار بعناية، وبرجع لأمي وباخد رأيها في الأدوار.

سلمى أبو ضيف

سلمى أبو ضيف: أول أجر من عالم الأزياء كان ألف جنية.. ومكنش في دماغي التمثيل

أوضحت سلمى علاقتها بدعم والديها لها في بداية حياتها، قائلة: شوفت الدعم من أهلي ودخلوني الجامعة اللي انا عايزاها، كان نفسي ابقى مذيعة اخبار كنت بحب انقل الاخبار للناس وكنت بحب فيلم جاءنا البيان التالي، ولكن بعد كده ملقتش ده شغفي.

واستكملت سلمى حديثها: عملت مودلينج في يوم مفتوح وخدت الف جنيه، ومعملتش فاشون شو في حياتي، وعملت مودلينج من 2014 لـ 2017، وبدأت من أول ظهوري في أغنية شيروفبيا وجيت فيها، ومكنش في دماغي اني همثل لما كلموني على مسلسل حلاوة الدنيا كنت بتنطط ومش مصدقه نفسي.

وعن تكريمها في مهرجان كان السينمائي، قالت سلمى: تكريمي في مهرجان كان دي حاجه بالنسبالي مهمة، شايفة مواهب كتير اوي ستات، وسافرت لوحدي عشان أشوف الأماكن اللي نفسي اروحها، وبفرح لما حد يقولي أن شكلي مصري.

واختتمت سلمى حديثها عن قصة حبها وعن وصولها للعالمية، قائلة: أتمنى أمثل في السينما العالمية، ولكن أدوار تمثل مصر هناك، وقصة حبي بـ إدريس حصلت صدفة في دبي والظروف لو سمحت هنعمل فرح هنعمله، ولكن إحنا مشغولين الفترة دي.