هشام ماجد يحذر ابراهيم فايق من الأربعينات: لو قلقان انا عايزك تقلق اكثر .. ندور على دكتور تجميل

مي جودة | فى حياة المشاهير

هشام ماجد وإبراهيم فايق

الأحد , 2 يونيو 2024 - 22:06 | اخر تحديث: الأحد , 2 يونيو 2024 - 23:06

قدم النجم هشام ماجد نصائحه للإعلامي ابراهيم فايق عن مرحلة الأربعينات، وكيف تغيرت حياته بمجرد بلوغه سن الأربعين.

قال هشام ماجد: "حتى القلق دي، أنا عايزك تقلق أكتر، سن الأربعين صعب، أولا من بعد الأربعين أنت مابتعدش بقى، انت مابتفتكرش انت 42 ولا 43 ولا 44، وبتبقى وصلت لكامل النضوج، بتبقى شايف الدنيا أوضح بكتير، عشان فات كتير في حيانك وحاجات كنت فاهمها غلط، وبتشوف الناس كلها بوضوح، وبتكون فكرة كاملة عن الناس اللي عدوا عليك في حياتك"، حسب تصريحاته لبودكاست "فايق ورايق X ابراهيم فايق".

هشام ماجد

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وأضاف هشام ماجد: الأربعينات فيها جزء حلو، بتبقى شايف الدنيا أوضح، وفيها جزء الدنيا بتجري، والعداد بيعد بسرعة، بتشوف كل حاجة صح وبتبقى متزن، الكلمة بتطلع منك بعد تفكير بحساب، مابتملاش بأي كلام في أي وقت وخلاص، القهوة بتاعت الصبح دي بالدنيا، أهم حاجة عندك، قعدة البيت بعد ما تخلص اللي وراك أحلى حاجة في العالم، السفرية لوحدك خالص دي ياااااه".

وأضاف هشام ماجد: بقيت حاسس أنك كبرت فجأة، يجي لك واحد ابن واحد صاحبك يقول لك يا Uncle، حد كبير يقول لك حضرتك، إيه يا حبيبي! انت شوفت ممثلين كانوا لسه طالعين ودلوقتي جراندات، وشوفت لاعبين كانوا طالعين من الناشئين ودلوقتي مدربين، وبعدين تقعد تتخيل يعني مثلا إبراهيموفيتش 41 سنة، أصغر مني بكتير، وكريستيانو، وميسي اللي بيعتبروه أبوهم في الارجنتين أصغر مني بكتير، عبد الله السعيد شيخ اللعيبة في مصر اصغر مني.

واستكمل هشام ماجد ممازحا إبراهيم فايق عن كيفية الهروب من السن، قائلا: "نشوف دكتور تجميل هايل، ندور عليه، يعني تسافر لبنان، حقن بقى، أنا معملتش كدة والله، بس عايز اعمل كدة، عايزين نشوف حد يصغرنا ناخد حباية تصغرنا".

وأكد هشام ماجد أنه يخشى العجز والمرض جدا، ويشعر بقبضة في قلبه عند دخول المستشفى.