بسمة: عيب "نعناعة" في "مسار إجباري" إنها "عيوطة" ومش بخاف من تقديم دور أم لشاب كبير

FilFan | فى سينما وتلفزيون

بسمة

الثلاثاء , 23 أبريل 2024 - 17:52 | اخر تحديث: الثلاثاء , 23 أبريل 2024 - 17:52

تحدثت الفنانة بسمة عن مشاركتها في رمضان 2024 بمسلسلي "مسار إجباري" و"بدون سابق إنذار".

وقالت بسمة في تصريحات صحفية عن شخصية "نعنانة" في "مسار إجباري" : "مكنتش عارفة حاجة عن المسلسل في البداية لكن كنت عايزة اشتغل مع نادين خان لأنها مخرجة شاطرة، وبدأت أعرف عن شخصية "نعناعة" إنها ست بسيطة وطيبة وفرفوشة روحها في ابنها وبتحب الحياة، وحدانية ومقطوعة من شجرة بعد موت أمها وأبوها في حادثة، هي ست لطيفة عيبها الأساسي إنها "عيوطة"، دي التركيبة اللي اشتغلت عليها قبل ما تتكتب الحلقات، من التفاصيل دي اشتغلت على الشخصية طريقتها في الكلام وشكلها الخارجي، كان في جزء من التحضير النفسي الشخصية دي لما تتعرض لموقف ما رد فعلها إيه، والمشترك بيني وبينها إحنا أمهات وعندنا قدر من التسامح".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

بسمة من مسلسل مسار إجباري

وأكدت بسمة أنها لا تقلق من فكرة تقديم دور أم لشاب قائلة: "المخرجة نادين خان من كام سنة كانت عايزين أعمل أم أحمد داش في مسلسل "أهل إسكندرية" لكن متعملش، أنا بحب أحمد داش وأعرفه من زمان وكنا زملاء مع بعض في أكتر من ورشة تمثيل وبحبه جدا، هو ممثل شاطر جدا ومجتهد والمشاهد اللي بينا كنا شغالين عليها على الأحاسيس قبل الكلام، وأنا بشوف أن دا تمثيل ومش هيلزق فيا في حياتي النهاردة أنا أم أحمد داش، من سنين كنت أم محمد الشرنوبي وقبلها بكام سنة كنت أم راندا البحيري اللي هي أصلا قدي، إحنا بنمثل واللي بيتفرج عليا عارف إننا بنضحك عليه ولو بنقدمه بحرفة هيوافق".

نرشح لك: وفاء عامر تكشف عن كواليس مشهد ضربها 4 مرات من رياض الخولي: "قولتوله أنت مش زوجي"

بسمة

وكشفت بسمة عن المشاهد الصعبة في مسلسل "مسار إجباري" قائلة: "كان في مشاهد صعبة منها مشاهد العياط مش دايما بسهولة أنك تعيطي، ومشهد الطرد من الشقة كان من المشاهد الصعبة لأنه كان حاد أوي، مشهد المواجهة لما اكتشفت أن فيه زوجة تانية".

وأوضحت بسمة أن فكرة العلاقة بين الضراير في المسلسل مختلفة بسبب ما حدث بينهما قائلة: "الاتنين ستات دول كان في بداية علاقة صداقة اتقطعت لما عرفوا إنهم ضراير، وكان ممكن تتطور بشكل مختلف لو الراجل مكنش مات، لكن الراجل مات وهما الاتنين عاقلين أولوياتهم في الدنيا أولادهم، "نعناعة" من مصلحتها أن ابنها ميبقاش وحيد يبقى عنده إخوات".

وكشفت بسمة عن موقفها إذا تعرضت لنفس الأمر واكتشفت أن لها ضرة قائلة: "لو اتحطيت في نفس الموقف هبقى زي المجانين أنا مش بقبل الكذب عموما واللي حصل في حق الستات دي هو كذب كل واحدة فيهم عايشة في كذبة".

بسمة من مسلسل بدون سابق إنذار

وعن مشاركتها في مسلسل "بدون سابق إنذار" قالت بسمة: "بدون سابق إنذار مكنش مخطط له، آسر صديقي من زمان حتى قبل ما نشغل في فيلم "رسائل البحر" وهاني خليفة صديق من زمان وعمرنا ما اشتغلنا مع بعض كنت حابه إني أروح استمتع بالشغل مع أصحاب موهوبين بحبهم حتى لو الدور مفيهوش أي تحدي، رحت وانبسط معاهم عملت دور صغير بس حقيقي ويتصدق كان ظهور خاص.