فاروق فلوكس: فؤاد المهندس وقت مرضه قالي سيب العمرة وتعالى شوفني وأغمى عليا أثناء دفنه

FilFan | فى سينما وتلفزيون

فاروق فلوكس وفؤاد المهندس

الثلاثاء , 26 مارس 2024 - 15:54 | اخر تحديث: الثلاثاء , 26 مارس 2024 - 15:54

كشف الفنان فاروق فلوكس تفاصيل دخوله الوسط الفني، وتفاصيل علاقته بالفنان الراحل فؤاد المهندس.

وقال فاروق فلوكس، في لقائه مع الإعلامية إنجي هشام، في برنامج "المنسي" المذاع عبر شاشة قناة "هي": "روحت أقابل أستاذ فؤاد المهندس واشتغلت معاه وبقيت مساعد مخرج ليه وبقيت مخرج، وكنا بنعمل فن في الجامعة وبرا الجامعة، ومن هنا ابتدا مشوارنا الفني، وفؤاد المهندس كان أستاذي وحبيبي لغاية ما توفى، ولما كنا بنقرأ عليه في الجامع ورايحين ندفنه أغمى عليا".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

فاروق فلوكس وفؤاد المهندس وسيد زيان من مسرحية سيدتي الجميلة

كما كشف فاروق فلوكس، تفاصيل الخلاف بينه وبين الراحل فؤاد المهندس، قائلا: "كان في بيني وبينه مواقف تزعل زي أي بني آدم، وهو طلع في أحد البرامج وقال أنه زعلان مني لأنه كان تعبان وأنا مروحتش له، وأنا وقتها كنت في السعودية بعمل عمرة، ولما جيت مصر بكلمه حمد الله على السلامة زعل مني أوي وحاولت أكلمه مفيش فايدة، لغاية ما روحت له المسرح وقالي لأ مش زعلان إزاي متجليش وأنا تعبان، قولتله كنت بعمل عمرة، قالي تسيب العمرة وتجيلي، وهو كان بيعتبرني ابنه البار".

نرشح لك: أجرأ 30 تصريحا للنجوم في رمضان: سحر شيرين عبد الوهاب وابتعاد أحمد الفيشاوي عن المخدرات وعودة بسمة بوسيل لتامر حسني ووصف خالد يوسف لحنان ترك وملايين نجوى فؤاد التي انفقتها على يسرا

فؤاد المهندس

أما عن رأيه في إعادة تقديم مسرحية سيدتي الجميلة، فعلق فاروق فلوكس: "مشوفتش مسرحية سيدتي الجميلة اللي عملها أحمد السقا وريم مصطفى، وهما عملوا النسخة الأصلية لمسرحية شيكسبير، ومش عارف هما عملوا شبه اللي فؤاد المهندس عملها ولا لأ".

وعن بداياته الفنية قال فاروق فلوكس: "أنا كنت في كلية الهندسة وكنت طالب متفوق، ولكن لما قامت حرب 1956 الدم غلي في عروقي مع أني كنت وحيد العيلة، وقعدت 55 يوم، وكنت صغير وأول مرة أخرج برا بيتي وشوفت حياة مختلفة والمصريين بيحبوا بعض في كل الحالات، والدكاترة في الكلية كملوا دراسة ولا أكن حصلت حرب، وجيت وقت الامتحانات وسقطت في 3 مواد وعيدت السنة، وقولت مش معقول هخلي والدي يدفع المصاريف، وكنت بساعد أصحابي وأخد فلوس، وبقيت معروف في الكافيتريا، وواحد جه قالي عايزينك تمثل معانا، وروحت وقالولي لقن لهم الكلام، وأنا مكنتش أعرف يعني إيه تمثيل ولا تلقين كلام".

وتابع فاروق فلوكس: "خلوني عملت دور خواجة وعملته غلط، والمخرج قال شيل الولد ده وشيل الدور كله مش مهم، وأنا اتغاظت لأني مبحبش الفشل، والأستاذ أبو بكر عزت هو اللي اكتشف موهبتي وعلمني ودربني وفهمني، ونجحت نجاح غير عادي، ودوقت حلاوة المسرح ونجاحه ومقدرش أني أنسى تصفيق الجمهور أبدا".