أوعوا يصعبوا عليكم ... تامر أمين يشيد بحملات المقاطعة في مصر تضامنا مع غزة

مروة لبيب | فى سينما وتلفزيون

تامر أمين

الأربعاء , 8 نوفمبر 2023 - 13:51

أشاد الإعلامي تامر أمين بحملات المقاطعة التي قام بها المصريون خلال الآونة الأخيرة للمنتجات التي لها علاقة بالكيان الإسرائيلي والدول الداعمة له.

وخلال تقديمه برنامج "آخر النهار" المذاع عبر قناة النهار قال تامر أمين " انتوا يا مصريين عاملين حاجة حلوة أوي ووطنية أوي وعروبية أوي وذكية ومؤثرة ألا وهي المقاطعة، وأزعم إني كنت من أوائل الناس اللي قلت قاطعوا لكن مش بمنطق إني أوجع البراندات الأجنبية والشركات اللي بتدعم الكيان وبتبعتله فلوس ووجبات مش دا الهدف الأساسي".

تامر أمين

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وأضاف تامر أمين "هدفي الأساسي من المقاطعة هو استغلال الفرصة الدهبية دي من أجل إقامة اقتصاد الوطني على أسس سليمة، علشان ندعم المنتج المحلي الصناعي ويدخل في كل حاجة غذائي وملابس ومنسوجات وأجهزة كهربائية، انتوا عاملين حاجة عظيمة".

وتابع تامر أمين "الهبة اللي حاصلة من كل المصريين تفرح، أوعوا يصعبوا عليكم .. المحلات الأمريكية بتنش والمصرية شغالة، الارزاق بتاع ربنا لأن الرزاق هو الله، وكل جنيه بتمنعه عن البراندات العالمية بيخسرهم في البورصة".

تامر أمين

ومؤخرا، وجه الإعلامي تامر أمين رسالة عتاب للفنان بيومي فؤاد، بعد الكلمة المثيرة للجدل التي ألقاها في نهاية عرض مسرحية "زواج اصطناعي" بموسم الرياض، وانتقد فيها طريقة انسحاب الفنان محمد سلام من المسرحية تضامنا مع الشعب الفلسطيني.

وقال تامر أمين "اللي إنت عملته يا أستاذ بيومي إنك تصدرت المشهد طواعية بدون مبرر، وخليت الناس تستفز منك بدون مبرر ومجانا".

وأضاف: "لو عايز تدافع عن نفسك والمجموعة اللي سافرت واشتغلت، ومحمد أنور اللي أنقذ الموقف بدل محمد سلام، كنت تطلع تقول يا جماعة ده شغلنا وإحنا ملتزمين تجاه شغلنا، وهذا لا يمنع أبدا تضامننا وتعاطفنا ودعمنا الكامل للقضية الفلسطينية والشعب الفلسطيني الشقيق، الذي يتعرض للإبادة الجماعية والسفك والقتل كل يوم".

وتابع: "أنا سمعت فيديو اعتذار محمد سلام مرات وليس فيه أي إهانة لفنه، ورقم اثنين إيه دخل حب أو كره السعودية في القصة؟ وإن لك الشرف تتصور مع مواطن سعودي، النجوم والفنانين كل الناس لها الشرف تتصور معاهم".

وأكمل: "ثالثا إيه دخل الفلوس في الموضوع؟ ذكر الفلوس هو اللي جاب لك الكلام يا أستاذ بيومي، وإنت غير موفق في هذه النقطة، كلنا بنشتغل علشان الفلوس، ونحب شغلنا ومهنتنا لكن مش مجانا".

وأشار تامر أمين إلى الجدل حول توقيت عرض المسرحية الكوميدية الآن قائلا: "إنت ابن بلد يا بيومي وأخلاق، لو أنا عامل فرح بنتي في الشارع، والعمارة جنبنا فيها ميت وحالة عزاء، هتعرف تعمل فرح بنتك وترقص وتغني للصبح؟ قلبك مش هيطاوعك، وإما هتأجل الفرح أو تلغيه، أو هتعمله من غير مزيكا".

وشهدت الساعات الماضية حالة من الجدل، بعد قيام الفنان بيومي فؤاد بمهاجمة الفنان محمد سلام في نهاية عرض مسرحية "زواج اصطناعي" بموسم الرياض.