أمير كرارة: قلدنا Peaky Blinders في "سوق الكانتو".. اتبسطوا وماتحبكوهاش - فيديو

مي جودة | فى سينما وتلفزيون

أمير كرارة في سوق الكانتو

الخميس , 22 يونيو 2023 - 19:46 | اخر تحديث: الخميس , 22 يونيو 2023 - 19:47

أنهى النجم أمير كرارة الجدل الدائر حول مسلسله الأخير "سوق الكانتو" الذي اتهمه البعض بأنه تقليد للمسلسل البريطاني Peaky Blinders، مؤكدا أنه كان يقصد تقديم نفس الفترة الزمنية.

قال أمير كرارة: "أول ما نزل البوستر أتقال بيقلدوا (بيكي بلايندرز)، اه إحنا بنقلده، أنا صريح جدا على فكرة، أنا كنت قاعد على الكرسي وحسين المنباوي جمبي وكان المسلسل شغال قلت له هموت واعمله"، وذلك في برنامج "الراديو بيضحك" على إذاعة 9090.

سوق الكانتو الحلقة الثامنة والعشرون

سوق الكانتو الحلقة الثانية والعشرون

وتابع: ويا عم اه بنقلده إيه المشكلة لما نعمل حاجة شبهه ما فيه زمن بتاع البريهات والبالطوهات، مش كان فيه مصر ما تيجي نعمل الزمن ده، وعملنا حدوتة تانية خالص، وأنا حبيت أغير الشكل بشكل المسلسل بالحدوتة والزمن، فتلاقي اللبس والشوارع والديكور مختلف، وقلت لـ هاني سرحان نفسي أعمل حاجة شبه بيكي بلايندر.

وأضاف: زي فيلم (البعبع)، اتقال بيقلدوا فان ديزل، اشمعنى بره هو بقى له عشرين سنة بيطلع بالجينز والفانلة البيضاء، ومكسر الدنيا، مشوا الدنيا وما تحبكوهاش، واتبسطوا إحنا بنعمل حاجة لطيفة، ما هم بره بيقلدوا برضه، وفيلم Man on Fire لدينزل واشنطن، كسر العالم، مع أنه هو هو الفيلم اللي عمله أميتاب باتشان من عشر سنين، أصل الحب واحد والكره واحد والأكشن واحد والكوميديا واحدة، هي تيمة وبنعملها بشكل مختلف، ما إحنا شوفنا مسلسلات كتير لواحد ومراته حبوا بعض واتطلقوا، واتجوز بعدها.

فيلم البعبع

ووجه أمير كرارة انتقاده للمسلسلات التركية، قائلا: "ما أنتم بتتفرجوا على تسعين حلقة في المسلسلات التركي والأحداث واحدة، ومش عارف بتتفرجوا على أيه ومبسوطين ليه، ومفيش أحداث وحاجة ملل وزعيق وصويت، وصعبة أوي، يعني أقعد مع مراتي ألاقي المسلسل فيه واحدة بتعيط علشان شافت حبيبها في الكشك معاه واحدة بعد 8 حلقات ألاقي البنت خارجة من الكشك، بس هي عقدة الخواجة تقريبا".

وينتظر أمير كرارة عرض أحدث أفلامه "البعبع" في عيد الأضحى، ويشارك في بطولته مع ياسمين صبري، باسم سمرة، ومحمد عبد الرحمن توتا، ومحمد أنور، بالإضافة إلى عباس أبو الحسن، والعمل من تأليف إيهاب بليبل، وإخراج حسين المنباوي.

سوق الكانتو الحلقة الثامنة عشرة

وكان أمير كرارة قد قدم مسلسل سوق الكانتو في شهر رمضان الماضى، وشارك في بطولته مي عز الدين، فتحى عبد الوهاب، أحمد صلاح حسنى، مها نصار، عبد العزيز مخيون، محمود البزاوى، شيرين، ندا موسى، تامر نبيل، ثراء جبيل، سلوى عثمان، ضياء عبد الخالق، أحمد التهامى، شريف ادريس وعدد آخر من الفنانين، تأليف هانى سرحان وإخراج حسين المنباوي، وإنتاج شركة سينرجي.