ميمي جمال: حسن مصطفى طلقني بسبب شال ومكانش ليه نزوات خالص

مروة لبيب | فى سينما وتلفزيون

ميمي جمال

الثلاثاء , 20 يونيو 2023 - 01:19

تحدثت ميمي جمال عن قصة زواجها من الفنان الراحل حسن مصطفى وانفصالهما بسبب الغيرة.

وخلال لقائها مع الإعلامي عمرو الليثي في برنامج "واحد من الناس" قالت ميمي جمال إنها كانت زميلة حسن مصطفى فى فرقة سيد بدير لمسرح التليفزيون، وكانت في ذلك الوقت مخطوبة لضابط وكان يريدها أن تتوقف عن التمثيل مضيفة "قال لى انا مستنيكى تخلصى تمثيل و بعدين نتجوز لان انا ظابط ماينفعش تبقى مراتى ممثله فحصلت لى كسره وقتها، وكنت بعمل مسرحية مطرب العواطف، وكنت بحكى ليه على اللى حصل معايا ، وكان والدى متوفى من وانا صغيره ، وكان بيحكى لى على كل حاجة وهو كان متجوز وعنده بنت".

ميمي جمال

وتابعت ميمي جمال "الاستاذ سيد بدير جه قال لى طالما بتحبوا بعض طيب ما تتجوزوا، فانا قولت ليه لا ازاى هو متجوز وعنده بنت، فقال ليه سيد بدير شوف مراتك وبنتك هتعمل معاها ايه و بعد كده نشوف، وبعد كده طلق مراته لان فى مشاكل بينهم كتير، وماما كانت رافضه الجواز لانه اكبر منى، و كان وكيل وزارة فى التربية و التعليم وكان ماسك المسرح المدرسي".

ميمي جمال وعمرو الليثي

واستكملت "انا ضغطت على ماما واتزوجته وقولت ليها احنا هنشتغل احنا الاثنين ونكبر مع بعض".

وروت ميمي جمال واقعة كادت أن تتسبب في طلاقها وقالت "حسن كان بيغير عليا بدون ما يحسسنى، و مرة فى المسرح مسرحية "دو رى مى فاصوليا" ، كنت لابسه سواريه، وواحدة زميله ربنا يسامحها ، قالتله مش شايف ميمى بتلبس ايه فى المسر ، فلقيته داخل عليا المسرح و بعد العرض قال لى انتى على طول بتلبسى كده لازم الفستان يتغطى بشال، و كنت مزنوقه فى العرض وملحقتش اجيب الشال وهو عرف انى ما لبستهوش وقال لى كده مش هينفع نكمل مع بعض لانى قولت حاجة وانتى ما نفذتيهاش، بعد ٣٠ سنة جواز، و ساب البيت وبقى يبات عند سمير خفاجة، وانا عملت الشال للفساتين، وكلمت سمير يقوله ميمى عملت اللى انت عاوزه واتصلحنا وحسن مكانش عنده نزوات ومكنش بيعمل حاجة غلط وأنا كنت بثق فيه".

يشار إلى أن ميمي جمال شاركت في رمضان 2023 في مسلسل "علاقة مشروعة".

مسلسل "علاقة مشروعة" بطولة ياسر جلال ومى عمر وداليا مصطفى ومراد مكرم، بسنت شوقى، عفاف مصطفى، ياسمين رحمي، وردشان مجدى، وعدد آخر من الفنانين، والعمل من تأليف سماح الحريرى وإخراج خالد مرعى وإنتاج مشترك بين شركتى "Forever Drama - مها سليم" و"media Hub – سعدى جوهر".