هالة صدقي: بنسافر الخليج نقدم اسكتشات مش مسرحيات ... والموضوع ده محتاج "كنترول"

نهال ناصر | فى سينما وتلفزيون

هالة صدقي

الأحد , 5 فبراير 2023 - 16:18 | اخر تحديث: الأحد , 5 فبراير 2023 - 16:18

كشفت الفنانة هالة صدقي سبب غيابها عن المسرح.

وقالت هالة صدقي خلال ندوة تكريمها في الدورة الـ12 من مهرجان الأقصر للسينما الأفريقية: أنا عاشقة للمسرح وأتمنى العودة إليه والفترة الأخيرة كان في عروض مسرح كتير لكن ده مش مسرح إحنا بنروح نعمل اسكتشات.

وتابعت: حتى لو في جمهور للفن المصري والفنانين المصريين، لازم يبقى في شوية كنترول وتنظيم للفرق المسرحية اللي بتسافر تعرض في البلاد العربية لأن في الآخر اسمها فرق مصرية، مهم أوي أننا نعرف أحنا بنقدم إيه ونستغل الفرصة أن في جمهور عايزنا، لما احنا بنعمل عرض لمجرد أن يومين 3 وقرشين وخلاص دا يقطم لك السكة اللي بعد كده وبدل ما أنت بتاخد قرش هتاخد 10 بس اثبت وجودك، مش التفكير المادي هو نمرة واحد، أنت هتقدم إيه عشان تحقق ماديا بعد كده، لكن للأسف في حالة استسهال وتسيب شديد جدا.

هالة صدقي من ندوة تكريمها في الأقصر للسينما الأفريقية

وأكملت لتسأل كيف يتم تقديم عروض مسرحية تستمر لأيام قليلة قائلة: أزاي مسرحية تتعمل في 3 أو 4 أيام دي حاجة تسيء لنا أنا نفسي أني أعمل مسرحية بجد وأعرضها على الأقل شهر عشان مبقاش بضحك على الناس، حاسة أني بقدم لهم سلعة مضروبة ومش بحترم وقتهم.

نرشح لك: خطوبة مفاجئة لـ نادين نسيب نجيم في عيد ميلادها (فيديو)

كشفت هالة صدقي سبب عدم مشاركتها في الأعمال المسرحية

وتحدثت هالة صدقي موضحة سبب عدم مشاركتها الفنان محمد صبحي في مسرحيته الجديدة وقالت: اعتذرت عن عدم المشاركة في مسرحية أستاذ محمد صبحي لأن كان عندي ارتباط ولأن المسرحية كلها كوميدي وأنا الوحيدة تراجيدي، قلت له هبقى نقطة ضعف أنا نفسي اشتغل معاه لكن لما الجمهور هيلاقيني أنا وهو على الأفيش هيفتكروا أنهم هيدخوا يضحكوا وهيستنوا ويلاقوني تراجيدي فقولت له حاسة اني هأذي مش هفيد.

على جانب آخر، تشارك الفنانة هالة صدقي في رمضان 2023 في مسلسل "جعفر العمدة".

هالة صدقي تشارك في رمضان 2023 بمسلسل "جعفر العمدة"

وتدور أحداث مسلسل "العمدة" في حي السيدة زينب، ويلعب محمد رمضان شخصية "جعفر العمدة"، المتزوج من أكثر من سيدة، ويعاني من ألم شديد بسبب اختطاف ابنه منذ 20 عاما، ونتابع رحلة بحثه عن ابنه للتأكد من وجوده على قيد الحياة، ومن جهة أخرى يقنع "جعفر العمدة" زوجته بوفاة ابنه، ويصحبها لقبر فارغ لقراءة الفاتحة على روحه.

ومسلسل "العمدة" تأليف وإخراج محمد سامى وشارك فى السيناريو والحوار مهاب طارق وإنتاج شركة ميديا هب سعدى - جوهر، وبطولة محمد رمضان، زينة، إيمان العاصى، هالة صدقى، مى كساب، أحمد داش، منة فضالى، هيدى كريم، فريدة سيف النصر، تامر عبد المنعم، طارق الدسوقى، وعدد آخر من الفنانين، وتدور الأحداث فى إطار اجتماعى شعبى.