كل ما تريد معرفته عن مسلسل "بالطو" قبل عرضه على Watch it

مي جودة | فى سينما وتلفزيون

الملصق الدعائي لبالطو

الجمعة , 27 يناير 2023 - 23:35 | اخر تحديث: الجمعة , 27 يناير 2023 - 23:37

من المؤكد أنك اصطدمت في منشور أو أكثر ساخر عن الأعمال الفنية لأحمد عاطف، يبدو أن الوقت قد حان لاستغلال موهبته في تقديم عمل فني عن قصة حياته كطبيب بشري.

نشر أحمد عاطف صورة للملصق الدعائي لمسلسل "بالطو"، المقرر عرضه قريبا على منصة "واتش إت" Watch it، وهو باكورة كتابات عاطف، وعلق عليه كاتبا عبر حسابه بموقع Facebook: "وأخيرا، البوستر الرسمى لمسلسل (بالطو)،
شوية معلومات سريعة عن المسلسل:
= المسلسل هيتعرض على واتشت قريباً جداً جداً إن شاء الله
= المسلسل مأخوذ عن رواية "بالطو وفانلة وتاب"
= إخراج: عمر المهندس
= قصة وسيناريو وحوار أحمد عاطف فياض (اللى هو أنا، وهيجي حد يسألنى يقولى وفياض دى جت منين، هرد عليه وأقوله، ده أسمى الثلاثى عادى، وهيبقى مكتوب ثلاثى كده ع التتر إن شاء الله، وده لسببين، أولاً عشان فيه كذا أحمد عاطف فى الوسط الفنى مخرج وموزع موسيقى ومدير تسويق، فلازم أضيف فياض منعاً لتشابه الاسماء، وثانياً وده السبب الأهم عشان الفنانة فيفى عبده والاستاذ أحمد عبد العزيز ما يعرفوش إنه أنا)
= اه وفيه لعيب كورة كمان فى نادى فيوتشر وجاى الأهلي اسمه أحمد عاطف، مش فاهم انا ايه الحوار ده، الواحد مش عارف يتهنى بـ أسمه!!
= المسلسل عن أحداث قصة حقيقية، اللى هى قصة حياتى، اللي أعتقد إن أي دكتور شاب بيتخرج فى مصر بيعيش وهيعيش قصة مشابهة ليها.
= الاحصائيات بتقول ان مسلسل "جريز أناتومى" على مدار السنين اتسبب فى دخول قرابة 200 ألف شخص لكلية الطب، على أمل انهم يعيشوا أجواء شبيهة، بإذن الله "بالطو" يحقق نفس المعادلة و الــ 200 ألف اللى دخلوا طب بسبب جرايز أناتومي يطلعوا من الكلية بسبب مسلسل بالطو.
= المسلسل 10 حلقات
= بطولة نجوم كتير جداً عملوا اللى عليهم وزيادة وفعلا اشتغلوا من قلبهم فى العمل وأنا بشكر كل واحد فيهم من أصغر دور لأكبر دور
= من ساعة ما أعلنت إن "بالطو وفانلة وتاب" هيبقى مسلسل، ناس كتير بتدخل تسألنى تقولى مين اللى هيعمل دورك فى المسلسل، اللى يسألني ويقول لي أحمد أمين؟ واللي يقول لي أحمد عيد؟ واللى يقول لي ماجد الكدواني؟ فمع حبى الشديد لكل النجوم الكبيرة دول بس المرحلة العمرية للدور محتاجة حد أصغر فــاللى هيعمل دورى ف المسلسل هو الفنان ماجد المصري.
= طبعا مفيش ماجد المصرى بهزر، ما انتو شايفين البوستر اهو يا جماعة، اللى هيقوم بالدور هو الفنان الشاب الموهوب جداً جدا ً عصام عمر.
وأتمنى فى النهاية إن المسلسل يعجبكو إن شاء الله ... عشان لو معجبكوش ... هنتريق عليه هنا ف الصفحة عادى خالص ... أنا معاكو فى أى حاجة".