ياسمين عز: اللي متجوزة موظف بنك بتتحسد عليه ... بيكونوا دايما على الفرازة

محمد سلطان محمود | فى سينما وتلفزيون

ياسمين عز

الأحد , 15 يناير 2023 - 21:01

كشفت ياسمين عز مقدمة برنامج "كلام الناس" على قناة MBC مصر، عن إعجابها الشديد بالرجال الذين يعملوا بالبنوك.

وأوضحت ياسمين عز أن موظفين البنك يتمتعوا بالعديد من الصفات التي تثير إعجابها وتجعل من حق زوجات هؤلاء الرجال الشعور بالغيرة عليهم من الآخريات.

وقالت: "اللي متجوزة موظف بنك دايما بتتحسد عليه، بيكونوا دايما على الفرازة، مابيكبروش في العمر، العمر بيجي لغاية عندهم ويقف، تحسي إنك متجوزة موديل، طول اليوم بيشف ويرف من الشياكة والنضافة وريحة العطر بتاعه اللي بتكون جايبة لغاية أخر الشارع".

نرشح لك- داليا شوقي لـ"في الفن": استعنت بصديقة مريضة بالسكري في التحضير لـ"هند" في "وبينا ميعاد" وردود الفعل فاقت توقعاتي

وتابعت ياسمين عز: " لو جوزك موظف بنك لكي حق تغيري عليه من أناقته ولياقته ولباقته اللي بتتمناها بنات كتير، وفي حاجة بتلفت انتباهي دايما، إيديهم وضوافرهم كانها دايما معمولة باديكير لوحدها والزوايد متقصقصة، مع إنه مبيعملش فيها حاجة، بس دي حاجة رباني".

وأكدت عز: "معروف أن الرجل طبيعته ربنا خلقه نضيف وبيشف ويرف، ولكن موظف البنك تحديد عدى المواصفات القياسية، داخل مستوى رفيع عشان يعلي درجاته".

وأشادت المذيعة بصوت موظفين البنوك، وقدرتهم على التحدث بنبرة خفيضة، قائلة: "صوته صيفي، لأنه رجل، بس بطبقة منخفضة تميل للجاذبية، القميص مسطرة، والبنطلون مكوي والجزمة بتلمع لمعة جلد التمساح، موديل مش موظف بنك".

وأكدت صعوبة اجتياز اختبارات القبول للحصول على وظيفة في البنوك، موضحة: "بتبقي ضامنة أنك متجوزة واحد يقدر يتحمل الضغوط، مر على كل أنواع الاختبارات اللي ممكن يعدي عليها أي حد، ده غير أنه بيكون خبير في فنون التعامل مع البشر، ومعدل ضبط النفس عنده غير طبيعي، الثبات الانفعالي أكتر من ياسمين عز".

وأردفت ياسمين عز: "فما بالك لما مراته حبيته تطلب منه حاجة، يا سعدك يا هناكي، جوزك موظف بنك، ده مش بعيد من قبل ما تطلبي الحاجة، يكون هو عارفها، عارف عايزة أيه ويعمل لك اللي نفسك فيه".

واختتمت نظريتها حول موظفين البنوك قائلة: "موظف البنك بيكون عارف الهدف بتاعه كزوج، وبالتالي يبذل كل طاقته عشان يحقق الهدف ده، ويوفر لك حياة جميلة أنتي وولادك، وعمره ما يطمع في فلوسك أبدا، يا هانم ده واحد بيكون تحت إيده ملايين مملينة، وعمره ما يطمع فيها، ما بالك بفلوسك أنتي، ومستحيل تطلبي منه فلوس يرد عليكي بجملة (هو أنتي فاكراني شغال في بنك) لأنه فعلا شغال في بنك".

ياسمين عز : اللي متجوزة موظف بنك لازم تتحسد عليه .. موديل بيشف ويرف من النظافة .. قميصه مسطرة وجزمته بتلمع لمعة جلد التمساح
تقدر تشوف الحلقه كامله على شاهد (اتفرج ببلاش)https://t.co/Ddga0AC1c7 #كلام_الناس #MBCMASR pic.twitter.com/AOWdaVpD2t
— MBC مصر (@mbcmasr) January 15, 2023

يذكر أن نقابة الإعلاميين استدعاء إحالة ياسمين عز للتحقيق، على خلفية الشكاوي المقدمة ضدها ومن بينها شكوى المجلس القومي للمرأة، كما أعلنت المحامية نهاد أبو القمصان تقدمها ببلاغ إلى النائب العام ضد ياسمين عز، بسبب تصريحاتها المحرضة على النساء والتي توجد بها مخالفات قانونية، على حد قولها.