راندا البحيري عن عدم دعوتها لحضور المهرجانات: أي مكان مش عاوزني خسران

محمد أحمد | فى حياة المشاهير

راندا البحيري

الأربعاء , 23 نوفمبر 2022 - 22:11

عبرت الفنانة راندا البحيري عن استيائها من عدم دعوتها لحضور المهرجانات الفنية.

وكتبت رندا البحيري عبر صفحتها بموقع التواصل الاجتماعي Facebook: "بحب بلدي وهفضل أحبها.. بلدي ماشية في دمي وجوا قلبي، من سنوات وإلى الآن مثلت بطولات وأفلام كتير جدًا، زمان بقى كنت اقرأ دايمًا مانشيت في مُعظم الجرايد والمجلات مكتوب (غياب نجوم السينما عن مهرجان السينما)".

نرشح لك - أنغام تخضع لعملية جراحية كبيرة وتعتذر عن حفلاتها

وذكرت: "وكنت بسمع بوداني إشادة بيا وبكام زميل يتعدوا على صوابع الإيد الواحدة.. اللي كنا بنروح سنويًا ندعم مهرجان بلدنا من قلبنا، والدليل أنه من قلبنا أن مكانش فيه سوشيال ولا ترند ولا حاجة بتحصل ولا بناخد فلوس ولا بناخد شهرة إحنا بس بنروح علشان نقف جنب مهرجان بلدنا اللي كان دايمًا بيتعمل في الأوبرا المصرية".

وأضافت: "على الناحية التانية كان فيه ممثلين مبيروحوش مهرجان بلدهم ده وبيهتموا جدًا بمهرجانات منافسة في بلاد معندهاش سينما بس علشان هياخدوا فلوس كتير لما يروحوا وكانوا بيروحوا جري وكنت برفض علشان بلدي، وكتير أوي من السنين كنت منتظمة في الحضور والندوات وغيره، لحد ما القائمين على المهرجان اتغيروا وهوب من ساعتها اتقطعت الأخبار والعنوان الحالي اللي هو نفسه العنوان القديم اللي كان بييجي عليه الدعوات لسه موجود ومبيجيبش عليه أي دعوات.. زي ما يكون حد جه تدخل ومسح اسمي من المدعويين".

ونوهت: "عمومًا هو ريحني من وجع قلب الماكياج والشعر واختيار فستان مناسب ولائق للحدث.. وبجد بجد أنا عند نفسي كبيرة أوي أوي أوي مكان مش عايزني هو اللي خسران والله هو اللي خسران مش أنا.. وده حصل من سنين كتير أوي وأنا عمري ما بروح مكان مش معزومة عليه ولا بروح مكان من غير دعوة علشان كده عمري ما هروح، والبوست ده مش علشان هم يعرفوا أن مبيجيليش دعوة لا البوست ده ردا على كل الناس اللي بتقول أنت ليه مبتشتغليش أو ليه مش موجود، علشان الدنيا كده.. أنت لو مصاحب الكل ولذيذ وعسل هتبقى موجود ولو مش مصاحب الكل حقك هيتاخد".

وتابعت: "أنا كفاية عليّ أني عاملة أكتر من 500 عمل فني وممكن أكتر بين أقل من 100 فيلم سينمائي وأكتر منهم مسلسلات إذاعية وتليفزيونية ومسرح ومشاريع تخرج ودوبلاچ، مثلت كتير جدا، ومثلت أدوار كتير بجد التاريخ هيفتكرها، ومثلت مصر وجبت لـ بلدي جوايز، وخدت دبلومة شرفية في التمثيل وخدت ألقاب برا البلد كتير جدا لكوني ممثله مصريه متميزة".