ياسمين عز: الراجل بينور ويطفي لكن الزرار عندك

مي جودة | فى حياة المشاهير

ياسمين عز

الخميس , 10 نوفمبر 2022 - 22:03 | اخر تحديث: الخميس , 10 نوفمبر 2022 - 22:04

وجهت مقدمة البرامج ياسمين عز رسالة لمتابعيها في برنامج "كلام الناس"، وبالأخص الزوجات للحفاظ على بيوتهن.

قالت ياسمين عز: "في ستات كتير بتنسى أن الزواج ميثاق غليط، وكلمة طلقني ماتتقلش على أتفه المشاكل، افهمي جوزك وامتصي غضبه وصوتك يبقى واطي، وماتبعيش ودانك لحد وماتسمحيش لواحدة فشلت في حياتها الزوجية تعمل لك غسيل مخ".

وتابعت: الست مش بتنور بعد الطلاق، الراجل بينور ويطفي لكن الزرار عندك.

ياسمين عز

وأضافت ياسمين عز: المشكلة أن نسبة كبيرة من الجيل هيبقوا أبناء طلاق وأغلبهم شافوا الخلافات وقرف بين باباه ومامته»، مضيفة: «صاحبتك اللي بتفضل تقولك اشتميه واخلعيه وأن زيك زيه وراسك براسه هل بتيجي الحرباية دي تقف معاكي وتقف مع عيالك لما يحتاجوا والله ما هتعبرك وهتلف على واحدة غير سعيدة في حياتها.

ياسمين عز

وتابعت: هتتطلقي وكله هيتخلى عنك واخواتك مش هيقفوا معاكي واختك هتاخدك عبرة وصاحبتك اللي سخنتك على جوزك هتخاف منك على جوزها.

واستطردت: الست بتضلم وتعتم بعد الطلاق ومش بتنور ولا حاجة والنور اللي بجد لما تعيشي حياة طبيبعة بينك وبين جوزك ولا فيلر ولا بوتوكس هيخليكي تنوري لان الراجل هو اللي بينور ويطفي اسألي جوزك ايه مضايقك وامتى تبقى صاحبته وحبيبته.

ياسمين عز

وقالت: "احمدي ربنا على جوزك وبلاش تبصي لزميلك في الشغل ولا قريب صاحبتك وتقارني بينهم، الراجل بيحارب طول اليوم بلاش تنكدي عليه وأول ما تشوفيه قوليله ربنا يديمك نعمة في حياتي".

ونصحت السيدات بعدم انتقاد أزواجهن وقالت: "اوعي تنتقدي جوزك قدام أي حد ولا تقولي مميزاته وتسمحي لجارتك أو أي حد في الدنيا انه ينتقد جوزك جوزك قدام الناس مفيهوش عيوب وكامل وروحي لجوزك وقوليله حبيبي لو عيوبك لو الكل عبهالك انا ابوسهالك واللي متغاظ مننا يعمل زينا".

واستكملت: اللي كانت بتسخنك دي هتبعد عنك وانتي قاعدة فاضية هي بتكلم جوزها والمولد هيتفض وكل واحده هتروح لحضن جوزها وانتي تفضلي تعيطي وتتحسري على حياتك وولادك.

وتابعت: عايزينك تكوني أذكى البنات واسمعي كلام العقل والأصول ومتسمعيش كلام مخرب اللي فشل في حياته عايزك تبقي زيه متسمعيش كلامه وقوليله انا بحب جوزي ووعيالي وخليكي ناصحة وواعية ومتبقيش ودانية وكل راجل ليه واي خناقة مهما كانت بتنتهي بعد نص ساعه كلمة حلوة وكيك.