بسبب "ريا وسكينة" ... نجل مصطفى محرم يهاجم جمال عبد الحميد: لو عاوز تعمل تريند مش على حساب والدي

نهال ناصر | فى حياة المشاهير

مصطفى محرم وجمال عبد الحميد وحسين مصطفى محرم

2 أكتوبر 2022 | اخر تحديث: الأحد , 2 أكتوبر 2022 - 17:10

رد المؤلف حسين مصطفى محرم نجل السيناريست مصطفى محرم على ما قاله المخرج جمال عبد الحميد عن مسلسل "ريا وسكينة" وأنه من قام بكتابته وليس والده.

وظهر حسين مصطفى محرم عبر حسابه على Facebook في فيديو ليرد على جمال عبد الحميد وقال فيه: فوجئت بفيديو وبلوم على الإعلامية الكبيرة منى الشاذلي أنها سمحت أن يتقال ومردتش وبطالب بحق الرد، اتصدمت أن مكنش في أي رد فعل، المخرج جمال عبد الحميد طالع بيقول أن هو لما جاله مسلسل "ريا وسكينة" كتابة مصطفى محرم رفض النص ومكنش عاجبة وطالع بيضحك ويقول أنه قعد مع أستاذ صلاح عيسى وكتب المسلسل من الأول للآخر.

عبلة كامل وسمية الخشاب من مسلسل ريا وسكينة

وتابع: دا عاري تماما من الصحة مفيش حاجة زي كده حصلت، وكلمت المنتج الكبير جمال العدل وحكيت له اللي اتقال والراجل اتصدم ومصدقش، واتضايق من الكلام ده.

نرشح لك: 5 ممثلين قدموا شخصية جيفري دامر قبل مسلسل Monster: The Jeffrey Dahmer Story

مسلسل ريا وسكينة إنتاج عام 2005

ووجه حديثه لجمال عبد الحميد: لو حضرتك عاوز تعمل تريند أو تلفت النظر ليك ميبقاش على حساب السيناريست الكبير الأستاذ مصطفى محرم والدي، ولو فاكر أن علشان توفاه الله مش هتلاقي حد يرد، لا هتلاقي مصر كلها ترد عليك لأن مصر كلها بتحب "لن أعيش في جلباب أبي" و"الحاج متولي".

بوستر مسلسل ريا وسكينة

وأكمل: بسأل حضرتك سؤال المسلسل إنتاج 2005 ليه حضرتك مقولتش الكلام دا وبعد 17 سنة بتقول ولا علشان والدي أتوفى السنة اللي فاتت وأنت أول لقاء عملته السنة دي، ومع احترامي لحضرتك مشفتش أنك عملت مسلسل من تأليفك ناجح، كان في مسلسل لمحمد سعد وتقريبا مكملوش.

أنا تقدمت بشكوى رسمية لنقابة المهن السينمائية وللنقيب الأستاذ مسعد فودة علشان يحقق في الكلام دا وعمري ما هسيب حق والدي وأسف أني بعمل فيديو زي كده الناس بتفتكر علشان حد مات نقدر نجور على حقوقه.

وكان جمال عبد الحميد قال في لقائه ببرنامج "معكم" مع منى الشاذلي: المسلسل كان بالنسبة لي مرفوض بعد ما شفت السيناريو، وسامي العدل قالي اقرأ الكتاب اللي مكتوب منه السيناريو، وكان للكاتب صلاح عيسى وقريته، وقابلت صلاح عيسى وهو حد مثقف ومدرك وواعي جدا الله يرحمه، وقلتله أنا هاخد الحوار وأخدت تفاصيله وعملتها مسلسل، وكتبت المسلسل بناء على اللي كاتبه صلاح عيسى، وكنت فرحان إني بعمل شغل لصلاح عيسى وأنا اللي كتبت السيناريو بتاعه للآخر.

ومسلسل "ريا وسكينة" بطولة عبلة كامل وسمية الخشاب ورياض الخولي وأحمد ماهر وسامي العدل سناريو وحوار مصطفى محرم والإخراج لجمال عبد الحميد.