ملخص رامي جمال في "سهرانين".. قصة أغرب لحن نفذه لمحمد حماقي وسر "المنقوشة" وماذا سيفعل مع المطرب النقاش؟

محمد أحمد | فى موسيقى وحفلات

رامي جمال

الجمعة , 30 سبتمبر 2022 - 12:28

حل الفنان رامي جمال ضيفا على أمير كرارة في برنامج سهرانين المذاع على قناة on e.

وتحدث رامي جمال عن العديد من كواليس حياته الشخصية والفنية وحكاية المطرب النقاش سنتعرف عليها في السطور التالية...

نرشح لك: روبي وتامر حبيب في وصلة رقص بحفل استقبال "شاهد" و"فودافون" (فيديو)

- أنا أول ملحن عمل معه الموزع "توما" وعرفته من 2002 وكان بيغني كورال وبعدين اتقابلنا عند مصطفى قمر في مكتبه.

- عملنا أول أغنية مع بعض كانت "خلص الكلام" وكانت اسم ألبوم محمد حماقي عام 2006 وكلمت حماقي وقولتله الأغنية توزيع توما، ومتوقعش إن دا شغل توما صحبه وكلمه قاله أنت بتوزع من ورايا ومن ساعتها توما وش السعد على كل الناس اللي اشتغل معاها ومنها أنا كمان.

- الشاعر أمير طعيمة مصمم يناديني باسم "رمانة" ودايماً يقولي أنت ابني مع أن الفرق بينا 7 سنين.

- مبسوط من نجاح أغنية "سقف" خاصة مع إصدارها في عام كورونا واتعمل كوميكس كتير عليها واتسمعت كتير في البيوت، ولكن الحظ السىء إنني لم استفيد من الأغنية بشكل كبير.

- أغنية "إوعديني"عرضتها على حماقي وتامر حسني ورفضوها وعملتها أنا وكسرت الدنيا.

- من أكتر الأغاني اللي تعبتني أثناء تلحينها هي أغنية "طمنوني عنيك" لمحمد حماقي" حيث قمت بتلحين الجملة الثانية من الأغنية ومكنتش عارف أطلع لحن الجملة الأولى وقلت لتوما شوف حد تاني يطلع اللحن أنا مش عارف.

- في يوم كنت أتناول الطعام مع توما وطلبنا منقوشة وأثناء تناول الطعام توصلت إلى اللحن المناسب للأغنية ووافق عليه محمد حماقي.

- لجنة تحكيم "ستار ميكر" رفضوني ولكني كنت عارف حجم موهبتي وعارف إني عندي حاجة وعندي الإيمان إني الحاجة دي هوصل بيها في يوم من الأيام.

- لما جالي بهاء الدين قالي عايزين نشتغل مع بعض وقلت له أنا نفس الشخص اللي حضرتك قولته من 20 سنة شوف شغلانة تانية غير المزيكا قالي إنت عارف إني بسببك مبقبلش برامج المسابقات ممكن تحكم على حد ويطلع عنده موهبة.

- أنا حبيت صوت أحمد سالم جدا "المطرب النقاش" والناس اتهمتنى إني عايز أركب التريند، رغم إنى شيرت الفيديو بتاعه قبل ما حد يشوفه، وقلت لمراتي الصوت ده حرام لو معملتش ليه حاجة.

- أنا هشتغل مع المطرب النقاش في أغنيتين، وفيه شركات كتير عارضة عليه الإنتاج لكنه هو يثق بي وأنا فى البداية سألته لو مانجحناش، هتعرف تشتغل شغلانتك تاني؟ وكان رده هرجع أشتغل عادي جدا.

- أنا مش شركة إنتاج، بس بعتبر أحمد زى أخويا الصغير، وممكن أتحمل مصاريفه لغاية ما ينجح.. عشمي في ربنا إنه يكسر الدنيا ومش همضيه عقد احتكار.