رامي جمال يكشف سبب مساعدته للمطرب النقاش أحمد سالم: كلنا أسباب لبعض (فيديو)

محمد أحمد | فى موسيقى وحفلات

رامي جمال وأحمد سالم

الأحد , 21 أغسطس 2022 - 19:25 | اخر تحديث: الأحد , 21 أغسطس 2022 - 19:26

تحدث المطرب رامي جمال في فيديو عبر حسابه بموقع التواصل الاجتماعي Instgram عن دعمه للشاب النقاش أحمد سالم.

وقال رامي جمال خلال الفيديو: "أولا إزيكوا، ثانيا عايز أتكلم عن حاجة مهمة جدا، أنا شايف القبول اللي ربنا كاتبه للفنان أحمد سالم، أحمد فنان بدرجة ما شوفتهاش في حياتي بصراحة مرتين تلاتة، أنا شايف القبول اللي ربنا كتبه والحب اللي أنتوا حابينه ليه، دي حاجة ما بتحصلش كل يوم".

نرشح لك: ناقد موسيقي: كليب محمد رمضان "ماركبش بسكلته" فاحش ومنحط ومتردي

وأضاف: "فرحان جدا جدا إن ما زال الصوت الحلو والفن الحقيقي الناس بتحبه وبتدعمه، فيه ناس كتير فرحانة وبتقولي شكرا إنك بتساعد أحمد، أنا مش بساعد أحمد، أنا بساعد نفسي كفنان وكملحن ومطرب برضو إن الوسط الفني لما يبقى فيه فنانين زي أحمد كدا وأصوات زيه، دي حاجة بترقى بالذوق العام، وحاجة بقينا محتاجينها كلنا".

وتابع رامي جمال: "ثانيا أنا اتربيت في بيت أهلي إن الفرصة لما بتيجي لحد بتبان إن ربنا باعتها، وإحنا كلنا أسباب لبعض، ممكن أنا أحاول أسهل مشواره في الفن، ودي حاجة بالنسبة لي قمة في السعادة، أنا وقت ما شوفت الفيديو بتاع أحمد كان لسه ما انتشرش بالشكل دا؛ لأن فيه ناس بتقولي أنت بتساعد بس عشان التريند، والله عمرها ما كانت شخصيتي ولا هتبقى شخصيتي؛ لأن مفيش حد ضامن أنه يعمل حاجة ونيته مش صافية إنها في الآخر هتوصله للنتيجة اللي هو عاوزها".

واستكمل: "بس أنا عاوز أقولهم حاجة لأن اللي باعتيلي كدا أكيد موهوبين بردو وأكيد مستنين الفرصة وأكيد مضايقين وشايفين إن الفرصة اللي ربنا إداها لأحمد والقبول اللي إداه لأحمد هما يستحقوه، بس والله بطمنهم، جايكلوا كلكوا الفرصة، الزرق من ربنا بميعاد، ولو ربنا سخرني لأحمد وسخر الجمهور له في إنه يبقى حاببه ويساعده دلوقتي، فرصكوا كلها جاية حاولوا".

وأشار: "اللي أحمد عمله في الآخر ڤيديو عادي جدا، وهو بيشتغل و زي الراجل وسيد الرجالة، لا راح وقف قدام إستديوهات ولا راح عمل حاجة، بس هو راجل نقي نيته سليمة، ففي الآخر الڤيديو بعد سنة ونص جه ميعاد إن ربنا يكتب له القبول فيه وإنه ينتشر جدا جدا".

وأردف: "عاوز أقول لكل الناس اللي ما أخدتش الفرصة، ربنا يديكوا أكتر من اللي اتمنتوه، وإن شاء الله زي ما ربنا وقفني لأحمد ووقف ناس ليا زمان، هيوقفلكوا ناس، جاي لرزقكوا ميعاد، وإن شاء الله لو ربنا كرمنا في مشروع أحمد، دي حاجة هتشجعني أنا كرامي وهتشجع غيري من الفنانين، وعايز أشكر كل الفنانين اللي كلموني، وكل شركات الإنتاج اللي كلمتني عشان عاوزة تبقى موجودة في مشروع أحمد، والله العظيم أنا لو سعيد بحاجة، سعيد إني شايف إن فيه ناس بتحب الفن الحقيقي، لو طلع لنا 10 أو 15 صوت زي أحمد، إحنا المستفيدين كلنا في الآخر".

واختتم رامي جمال قائلا: "بقول لكل الناس شكرا لكل اللي عملتوه مع أحمد، أنا معملتش حاجة خالص لسه، وحتى بعد ما أعمل، أنا مش بعمل لأحمد، أنا بعمل لنفسي عند ربنا في فكرة إن مفيش حد هياخد زرقي، فاللي بيسهل لحد حاجة هيلاقي مليون واحد يسهله حاجات تانية، ربنا يكتبله الخير، وإن شاء الله الفترة اللي جاية يبقى فيه مفاجآت كتير، وبوجه لأحمد رسالة عن طريقكوا هنا كفاية برامج لو سمحت لحد ما تخلص الأغاني، يومكوا جميل".

View this post on Instagram

A post shared by Ramy Gamal (@ramygamalmusic)

وكان المطرب النقاش أحمد سالم قد تصدر تريند مواقع التواصل الاجتماعي، بعد انتشار فيديو له أثناء غنائه بكره يا حبيبي للفنانة الجزائرية وردة، خلال عمله في طلاء المنازل، وزاد الأمر بعدما أعلن رامي جمال عن البحث عنه لعمل أغاني له.

اقرأ أيضا:

أسما شريف منير "روائية" وتقتحم مجال التمثيل .. تعرف على رد فعل والدها
فستان طوله أمتار وموكب أبيض .. مشاهد مبهرة من حفل زفاف جينيفر لوبيز وبن أفليك للمرة الثانية (صور)

الدوري في "ميت عقبة"؟ … بلال علام معلقا على مباراة الزمالك والاتحاد السكندري

حسام حبيب ونصر محروس أشهرهم ... "بوس الإيدين" طريقة شيرين عبد الوهاب للتعبير عن الامتنان

لا يفوتك: وئام مجدي لـ"في الفن": اتسببت في طلاق رجل ضايقني على السوشيال ميديا... وتيتة مش عارفه أنها بتتصور

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5