التعليق الأول من أكرم حسني على سرقته كلمات "للي" مع محمد منير

مي جودة | فى حياة المشاهير

أكرم حسني

الخميس , 21 يوليو 2022 - 23:07

رد النجم أكرم حسني على إدعاءات الشاعر عادل صبري باتهامه بسرقة بيت من كلمات أغنيته الجديدة "للي" التي قدمها مع النجم القدير محمد منير.

وكتب أكرم حسني عبر حسابه بموقع Facebook: "قريت من شوية بوست بيتهمني بسرقة كلمات اغنية " للي " من شاعر من جنوب مصر الحبيب و بعدها اكتر من صحفي كلمني بيطلب مني رد علي الاتهام ده .. ف خلوني اوضح كذا نقطة :
١ - كل الحب و الاحترام و التقدير لكل موهبة فنية بتقدم فن يحترم الجمهور و جنوب مصر خرجلنا شعراء و ادباء كتير علي رأسهم الخال الابنودي رحمة الله عليه
٢ - أؤمن بحقوق الملكيه الفكريه كما أؤمن بان السرقه الفنيه تصنع نجاح مؤقت
٣ - تشابه جملة من الأغنيه التي تتكون من ١٢ بيت مع جملة للشاعر لا يعني السرقة و انما توارد الافكار امر طبيعي
٤ - لما كتبت الاغنية كانت مكونة من ٢٠ بيت اختار منهم الكينج ١٢ بيت و تم تسجيلهم ف معتقدتش اللي كتب ٢٠ بيت هتقف معاه في جملة عشان يسرقها
٥ - انا بكتب اغاني بقالي اكتر من ٨ سنين من خلال برامج و مسلسلات و اعمال فنية قدمتها و كنت علي سبيل المثال في اغاني برنامج ابو حفيظة قبل ما بستخدم لحن اي اغنية في البرنامج برجع لجمعية المؤلفين و الملحنين و اسدد الرسوم حفظا لاصحاب حقوق الملكية الفكرية .. ف اللي يعمل كده بيتهيألي صعب يحط نفسه في موقف زي ده
٦- انا مهنتي الاساسية ممثل و بحب صناعة الاغاني من باب الهواية ف انا مش محتاج اسرق عشان اعمل رصيد لنفسي كشاعر .. انا بعمل ده بحب
٧ - و اخيرا .. انا كتبت البوست ده مش دفاعا عن نفسي و لكن لاحترامي للجمهور المحترم اللي بيثق فيا ف حبيت اوضح له

وتقول كلمات أغنية "لِلّي" :

سألته هل داء الولع كان الجواب صدّه
ساق الدلال ساق الدلع مفاتيح هواه صدّوا
ومشيت أوشوش في الودع ولا جاني ليه ردّه
اللي فتح باب الوجع واجب عليه ردّه

يالا و يا لالا و يا لالا يالا و يالا لِلّي (يكرر 4 مرات)

بعيونه بضرب ميت مثل أول ما بيطلّوا
دَوقّته من طعم الغَزَل دوقّني من ذلّه
وبحبه أنا مهما حصل طب مين بقى يقولّه
ماهو لو حبيبك كان عسل
متخلّصوش كلّه

يالا و يا لالا و يا لالا يالا و يالا لِلّي (يكرر 4 مرات)

كانت نار تقيد من لمس إيد من حضن من ضَمّه
وإن راح بعيد النار تزيد وأصرخ وأقول يامّه
الروح تروح وأنين ونوح ومافوقش غير لمّا
يرجع أوام ده عليه قوام حواليه بنترمّي

سألته هل داء الولع
كان الجواب صدّه
ساق الدلال ساق الدلع
مفاتيح هواه صدّوا
ومشيت أوشوش في الودع
ولا جاني ليه ردّه
اللي فتح باب الوجع
واجب عليه ردّه

وأغنية "لِلّي" من كلمات وألحان أكرم حسني، إنتاج موسيقى أمير محروس، والكليب من إخراج مريم الباجوري.