تامر حسني لجمهوره: أي حد قرأ معلومة في كتاب يكتبها عشان نستفيد من بعض

محمد أحمد | فى حياة المشاهير

تامر حسني

الخميس , 9 يونيو 2022 - 11:49 | اخر تحديث: الخميس , 9 يونيو 2022 - 11:50

شارك الفنان تامر حسني جمهوره بعادة يفعلها يوميا، وهي القراءة لعدد من الشيوخ والكتاب.

وأبدى تامر حسني سعادته بردود الأفعال التي تلقاها من جمهوره بعد إعلانه الإفصاح لهم عن عادة يفعلها يوميا.

نرشح لك - سيمون رمز التسعينيات للمرة الثانية .. "ريفو" يستعين بأغنيتها الشهيرة بعد "بيمبو"

وكتب تامر حسني عبر صفحته بموقع التواصل الاجتماعي Facebook: "بخصوص بوست العلماء اللي نشرته إمبارح، أنا والله والله طاير من الفرحة بسبب حسن استقبالكم له، علشان كذا حد قالي ماكتبش الكلام دا عشان المفروض إني أتكلم معاكم عن شغلي الفني بس".

وأضاف تامر حسني: "أنا شايف أن شغلي معاكم مش فني بس بل مؤخرا بقيت أحس أنه إنساني أولاً والفني ثانياً وتأكدت من كدا بعد قراءتي لتعليقاتكم اللي تشرح القلب وعرفتني إني صح وإن رغم صعوبة زمنا اللي الهلس فيه بقى ليه جمهوره ومريدينه لكن الكلمة الصادقة والمؤثرة ما زالت لها جمهورها وموريدينها حتى لو فيهم ناس هما هما اللي بيهتموا بالجانبين عادي".

وتابع: "الإنسان مننا جواه الاتجاهين بشكل نسبي المهم هو هينمي مين فيهم ويهتم بيه أكتر زي البذرة الجميلة اللي بكرا هتكبر وتبقى شجرة مثمرة له ولكل من حوله، هعمل معاكم فكرة جميلة أي حد فيكم قرأ كتاب وحب أهدافه أو سمع معلومة أو مقولة عجبته ياريت يكتبها هنا ونعتبر إننا عندنا كل فترة قاعدة نفكر فيها ونستفيد كلنا من بعض جايز كلنا لما نتجمع على منفعة الناس ربنا يعزنا أكتر وينور طريقنا أكتر".

واختتم تامرحسني حديثه قائلا: "يعني زي ما طلبتوا مني أنكم تتعرفوا على حاجة جوايا شخصية زي بقرأ لمين أو بتابع مين أنا كمان أحب أعرف في نقط صغيرة ما تعلمتوه من أي كتاب أو قصة أو موقف شخصي أو مقولة مفضلة أنا عن نفسي أحب أن أنشر هذا المعنى وأتمنى أن يوصل للدنيا كله".

وبدأ تامر حسني أمس بنشر المعلومات عنه حيث كتب: "أول مرة أعلن عن شيء بداخلي بالشكل دا، بس حسيت فجأة أن واجب عليا أنقلكم أي شيء بيفيدني عشان يفيدكوا معايا، أتمنى من كل متابعيني الاهتمام والبحث والحفاظ على كل ڤيديوهات ناس صعب تتكرر تاني أتمنى من كل قلبي متابعتهم، الشيخ محمد متولي الشعراوي العالِم مصطفى محمود، الدكتور إبراهيم الفقي، الداعية مصطفى حسني، الأستاذ أحمد الشقيري، الشيخ عمر عبدالكافي".

يذكر أن تامر حسني ينتظر عرض فيلمه الجديد "بحبك" في عيد الأضحى المقبل، ويخوض من خلاله تجربة الإخراج السينمائي للمرة الأولى، وذلك بجانب لعب دور البطولة وكتابة الفيلم، فيما تتولى شركة "تامر حسني للإنتاج" للمنتج حسام حسني المشاركة في إنتاج العمل مع شركات سينرجي، سكاي ليميت وفيلم سكوير، ويشاركه البطولة هنا الزاهد، هدى المفتي، حمدي المرغني ومدحت إسماعيل.