هاني شاكر عن تصريحات نجيب ساويرس: أنا مش جاي اشتغل داية في النقابة واللي ملوش فيها ميتكلمش

نادين يوسف | فى حياة المشاهير

هاني شاكر ونجيب ساويرس

السبت , 20 نوفمبر 2021 - 02:33 | اخر تحديث: السبت , 20 نوفمبر 2021 - 10:10

عبر الفنان هاني شاكر نقيب المهن الموسيقية عن استيائه وغضبه من تصريحات نجيب ساويرس بخصوص قرار شاكر بمنع غناء 19 من مؤديين المهرجانات

نرشح لك: كيف تقضي إجازتك في المالديف على طريقة رنا رئيس ؟ السعر خيالي

قال شاكر في مداخلة هاتفية مع الإعلامي عمرو أديب في برنامج "الحكاية" المذاع عبر شاشة MBC مصر "أنا ميشرفنيش أنه يسمعني واللي بيسمع النوعية دي مينفعش يسمعني وتعالى بص على حفل الموسيقى العربية الجمهور كان قد ايه والأغاني اللي اتقدمت واستقبال الجمهور ليا كان ازاي فانا مش محتاج نصيحته علشان استمر اغني مهرجانات"

وتابع قائلًا "لازم يسألوا قبل ما يتكلموا والأسماء اللي موحودين دول مش اعضاء نقابة فبالتالي مش منحقهم يمارسوا المهنة ولازم نبلغ الاوتيلات"

وأضاف "قانون النقابات اني احافظ على حقوق أعضائي ومسمحش والأخ اللي بيقول انت بتهتم بالمعاشات هو أنا جاي اشتغل داية في النقابة واللي عيان اديله الدوا والمسكين اديله لقمة ايه الكلام الفارغ دة"

واسترسل قائلًا "دور النقابة اني احافظ على اعضائي والمهنة والشكل العام ومينفعش نبقى في عصر فيه السيسي ويبقى دة الفن اللي متصدر وانا مش بتجنى على حد محدش فيهم عضو نقابة مفيش غير شاكوش وحمو بيكا وحمو بيكا امتحن وسقط وخلاص ملوش علاقة بالنقابة وشاكوش لحد ما ارتكب الجريمة اللي الاساتذة الاتنين شايفين أنها عادي"

وردًا على سؤال عمرو أديب حول دور المصنفات الفنية قال "دة دور النقابة ودور المصنفات الفنية وفي تنسيق بيني وبين دكتور خالد عبد الجليل ومينفعش عضو عندي يطلع يقل ادبه ودة قانون في النقابة أنه يلتزم بالآداب العامة"

وعن وضع حمو بيكا وحسن شاكوش قال "اللي كانوا عندي كان حمو بيكا ودة امتحن وسقط وشاكوش ودة طلع عمل فعل فاضح على المسرح الباقين مليش دعوة بيهم وبالتالي ببلغ الجهات المعنية أن الناس دي أنا مليش دعوة بيهم"

وتابع قائلًا "اللي عايز يسمعهم يروحلهم الجونة أو أي حته بيروحوا فيها، وفي الجونة بيبقى في تصريح طبعًا والمشكلة مش في التصريح ولا الرسوم الفكرة في مزاولة المهنة واليوتيوب موجود ولو حد عايز يجبهم برة مصر يجبهم "

وأضاف "أنا لغة التهديد دي مش هقبلها وزي ما أنا مش عاجبه هو كمان مش عاجبني والمهرجان اللي عمله انا معلقتش عليه والفضيحة اللي حصلت في الجونة محدش اتكلم عليها وانا عن نفسي سكت واللي ملوش في حاجة ميتكلمش فيها والنقابات مش معمولة علشان ندادي الأعضاء ومصر فين من دة كله مش من حقها أننا نخاف عليها"

واختتم حديثه قائلًا "الوقف دة قرار نهائي لانه مش قراري لوحدي دة قرار المجلس كله"

لا يفوتك: لغز المشهد الأخير في حياة العملاق سيد درويش البحر ... شهادات أمه وأخيه وحياة صبري وبديع خيري