الملخص- محمد هنيدي في "سهرانين": أحمد زكي قالي "مثل بضهرك" وفكهاني جاري كان كل يوم يسألني بوست ليلى علوي ولا لسه

نهال ناصر | فى حياة المشاهير

محمد هنيدي

الأحد , 21 فبراير 2021 - 14:51 | اخر تحديث: الأحد , 21 فبراير 2021 - 14:53

حل الفنان محمد هنيدي ضيفا على برنامج "سهرانين" من تقديم أمير كرارة ويعرض عبر قناة ON.

وخلال الحلقة حكى هنيدي عن ذكريات من طفولته وكواليس أعماله وبداياته الفنية.

نرشح لك: براءة رانيا يوسف من تهمة الفعل الفاضح بعد تصريحات جريئة في لقاء تليفزيوني

وفي نقاط نستعرض أبرز تصريحات محمد هنيدي خلال الحلقة:

- أنا كنت أقرب حفيد لجدي وكان ليا معاملة خاصة، ولما مات قالولي سابلك حاجة افتكرت ورث لكن طلع "الصديري والعصايا" وانفعلت وقتها ورميت الحاجة على الأرض.

- أنا جيت بعد 4 بنات فكنت مميز عند جدي، وكنت بحبه جدا ومش بحب أزعله، وكنت طفل مدلل.

- كنتب بتوه وأنا صغير أول ما أشوف زفة عروسة أجري وراها وألاقي نفسي بعدت عن إمبابة وتوهت، وحتى الآن أتواصل مع أصدقائي في إمبابة.

- كنت أحب الجلوس في سوق الفاكهة وأمسك الميكروفون وأنادي للبيع، وتعلمت اللهجة الصعيدية من هناك.

- تأثرت بشخصية بائع فاكهة وأحاول كتابة عمل عنه، وكان سعيد جدا بنجاحي في التمثيل وكان دائما يسألني "بوست ليلى علوي ولا لسه".

- تعرفت على علاء ولي الدين في معهد الفنون المسرحية، أما أشرف عبد الباقي تعرفت عليه في الإسكندرية كنت أقدم مسرحية هناك.

- أنا وعلاء ولي الدين وأشرف عبد الباقي كنا دايما بنسهر في مركب "عم أحمد" في النيل.

- لما سقطت في المدرسة وقفت ناس على ناصية الشارع علشان جواب النتيجة ميوصلش لوالدي.

- لعبت كرة القدم في نادي الزمالك ودخلت مدرسة الثانوية الرياضية، واترفدت أسبوعين من المدرسة بسبب أني غرقت استاد القاهرة بالمايه قبل مباراة الأهلي والاتحاد.

- اترفدت من كلية الحقوق بعد أول سنتين.

- "صعيدي في الجامعة الأمريكية" كان فكرتي كان اسكتش بنقدمه في الجامعة.

- اشتريت البدلة الصفرا في "صعيدي في الجامعة الأمريكية" من وكالة البلح، ومحتفظ بيها لحد النهاردة.

- قدمت تامر حسني في حفلة قبل 21 سنة كان لسه شاب وأنا يسرا كنا بنختار من بين بعض الموهوبين.

- مفيش كوميديان يضرب ويعمل أكشن، الكوميديان لازم بيضرب ويصعب على الناس.

نرشح لك: محمد هنيدي: تركت امتحان من أجل فاتن حمامة وسعاد حسني رفضت تقابلني

- بعشق شخصية "رمضان مبروك أبو العالمين" وساعات بعيش بيه مع أسرتي وأصدقائي.

- قابلت شخصية "عفت الشربيني" التي قدمتها "في جاءنا البيان التالي" في مهرجان الإسكندرية، لفتت نظري بطريقة كلامها، ومحتفظ بكل ملابس وإكسسوارات الشخصية حتى الآن.

- تركت امتحان في المعهد علشان أمثل مع فاتن حمامة في "يوم حلو ويوم مر" ولما شافتني أثنت عليا واستمرت علاقتي بها حتى آخر يوم في عمرها.

- أحمد زكي في فيلم "البطل" قالي "مثل بضهرك" لما كان في مشهد الكاميرا بتصورني من "ضهري" وطلب أن أؤدي المشهد بشكل جيد.

- رفضت بطولة فيلم مع يوسف شاهين لأن الدور مكنش مناسب ليا، وكان جاري في العجمي وبأقضي إجازة الصيف معاه.

- سعاد حسني رفضت تقابلني وقالت أنها مبقتش سعاد بتاعة زمان، واستمرت علاقتي بيها على التليفون وهي في لندن وكانت لما ترد متقولش "ألو" تقول "زوزو".