حسني شتا ينفعل على المتابعين: أنتوا بتدخلوني النار ليه؟!

ولاء مطاوع | فى حياة المشاهير

حسني شتا

22 أغسطس 2020

انفعل الفنان حسني شتا على متابعيه، بسبب تعليقات البعض التي تثير ضيقه واستيائه.

تلقى حسني تعليقًا عبر صفحته على facebook، فنشره وكتب معلقا عليه: "الأستاذ ده كاتب لي كومنت بيقول لي الله يلعنك ويلعن أمثالك، اللي هو بيلعني ليه طيب! علشان أنا ممثل؟ ولاعلشان إيه عاوز أفهم، وبعدين بدل ما يلعني طب ما ينصنحي باللي عاوز يقولهولي، الأستاذ عايش في فرنسا وأكيد ماشي يلعن كل الناس هناك".

تابع: "بجد أنا بحاول ما انتبهش لأي كلام سلبي أو كلام فيه كمية أمراض نفسية بتدل على قدر تخلف أصحابها النفسي والعقلي وكل اللي بعمله إن ببتسم وبقول ربنا يشفيه، بس أول مرة أحس إني متضايق بسبب تعليقات شبه كده، زي مثلا واحده كانت كاتبة لي بحبك أوي وبموت فيك ودمك خفيف وقمر وأي حاجة بتمثل فيها بتفرج عليها علشانك بس يا خسارة مصيرك جهنم، دخلتني النار".

أضاف حسني شتا: "وتعليقات كتير طول الوقت بحبك بس ربنا يهديك وتبطل تمثيل، بحبك وبحب دورك في كذا بس ربنا يهديك، أنا فعلا مش مستوعب هو إنتوا بتدخلوني النار ليه؟ ومنين بتتفرجوا وتسلوا وقتكم وتضحكوا وتنبسطوا من قلوبكم وتبقى في قمة السعادة إنك تتصور مع ممثل وفي الآخر أنت شايفه في النار؟ مش لاقي تفسير، هو إنتوا فعلا شايفنا في النار وإن إحنا شياطين؟ بس أنا بحب مهنتي جدا وبحب كل الناس اللي بتحبني وبدعي للناس اللي بتفكر بشكل غريب ربنا ينور عقولهم".

‎ ‎

‎ ‎
يُذكر أن حسني شتا شارك في موسم رمضان 2020 بمسلسل "ليالينا 80" من بطولة إياد نصار، وغادة عادل، وخالد الصاوي، وصابرين، وميدو عادل، ومحمد علي رزق، وعماد رشاد، ومن تأليف أحمد عبد الفتاح، وإخراج أحمد صالح.

اقرأ أيضًا:

تفاصيل ومعلومات- فيلم "جريمة على ضفاف النيل" عن رواية أجاثا كريستي.. تم تصويره في مصر والبطلة إسرائيلية

بالفيديو- رقص يسرا وإلهام شاهين وهالة صدقي على "بنت الجيران"