فيديو- موقف دياب من تقديم أغاني المهرجانات

إيمان مندور | فى موسيقى وحفلات

دياب

الثلاثاء , 16 يونيو 2020 - 11:06 | اخر تحديث: الثلاثاء , 16 يونيو 2020 - 11:06

تحدث الفنان محمد دياب عن كواليس مشاركته في الموسم الرمضاني الماضي، وكذلك غيابه عن الساحة الغنائية خلال الفترة الأخيرة.

أوضح دياب خلال مداخلة هاتفية مع الإعلامية لميس الحديدي ببرنامج "القاهرة الآن" على قناة "العربية الحدث"، أن حال السوق الموسيقي الآن به الكثير من الاضطرابات، مضيفا: "طريقة سمع الناس اختلفت. إن حد يلاقي غنوة تلفت الناس دلوقت بقا صعب جدا، الناس بتحس إن أنا اتخطفت م الغنا بالتمثيل عشان بيشوفوني كتير في التمثيل، لكن أنا مبعدتش ولا حاجة، بالعكس بعمل حاجات دلوقت وإن شاء الله تظهر بعد أزمة كورونا ما تنتهي".

وعن رأيه في غناء المهرجانات، وهل يمكن أن يقدمها مستقبلا، قال دياب: "المهرجانات اتهاجمت في بداياتها لكن الآن أصبحت أمر واقع، وده معناه ان ذوق المتلقي اختلف، وأنا كسلعة لازم أقرب لذوق المتلقي بدون ما اتخلى عن الذوق الموسيقي اللي بقدمه.. أنا بقدم اغاني خفيفة تليق عليا، إنما عشان تقرب للمستمع دلوقت بقا أمر صعب جدا".

تابع: "أنا مش هغني مهرجانات لانه مش لوني، مينفعش بعد ده كله اروح اعمل مهرجانات لا بعد السن ده ولا المشوار ده.. الأزمة فعلا إن الناس بقت ملولة جدا وهي بتسمع فلازم تعمل حاجة تشدهم أوي".

يُذكر أن دياب شارك في موسم رمضان 2020، بأربع مسلسلات، ظهر كضيف شرف في "الاختيار" و"البرنس" و"ليالينا 80"، بينما شارك في بطولة مسلسل "فرصة تانية" من إنتاج شركة "سينرجي" للمنتج تامر مرسي، وإخراج مرقس عادل، ومعالجة درامية محمد سيد بشير، وتأليف مصطفى جمال هاشم، ويضم المسلسل عدد كبير من الفنانين هم ياسمين صبري وأحمد مجدي وهبة مجدي وآيتن عامر وأحمد الشامي ونهال عنبر ومحمود البزاوي.