تصريح جديد لريهام سعيد بعد اعتزالها العمل الإعلامي: مش عايزة شكر ولا تكريم

مروة لبيب | فى حياة المشاهير

ريهام سعيد

الثلاثاء , 27 أغسطس 2019 - 13:08 | اخر تحديث: الثلاثاء , 27 أغسطس 2019 - 13:08

في تصريح جديد لها منذ إعلان خبر اعتزال العمل الإعلامي، أعادت الإعلامية ريهام سعيد نشر الفيديو الذي تسبب في صدور قرار منعها من مزاولة العمل الإعلامي بعد أن وصفوه بأنه يهين مرضى السمنة.

وعلقت ريهام سعيد على الفيديو قائلة "يا رب اعيش لغايت ما اشوف حقي بيرجع لي. مش عايزه شكر ولا تكريم انا اجري عند الله بس انا ليه حق ولازم يرجع".

وكانت ريهام سعيد قد أعلنت اعتزالها العمل الإعلامي نهائيا في أعقاب قرار إيقافها من قبل قناة "الحياة" ونقابة الإعلاميين من خلال فيديو نشرته عبر صفحتها الرسمية على Facebook قالت فيه ""بما إن هناك حملة ممنهجة من خلال المواقع اللي بتنزل كل ٣ دقائق حاجة من الصبح تقوّم بيها الناس مش حقيقية، فمجرد أن حد يقرا اني أهنت الناس البدينة ومرضى السمنة، واحنا ناس بنكسل نقرا وبنكسل نشوف، فمبنصدق على طول ويزيط مع الزيطة ومش مهم بقى الست دي حالها وعيالها.. مش مهم بقى.. مش مهم نكذب ونصدق الكذبة".

وأضافت الإعلامية "المهم إن أي حد ساهم في وقفي النهارده من الصحفيين والمواقع أو ناس بتكذب أنا مقلتش ولا حاجة.. والله العظيم ما قلت ولا حاجة.. كل الناس اللى بتكتب تعليقات تحت الأخبار في المواقع واضح إنها سامعة وحافظة مش فاهمة".

وتابعت ريهام "مفيش حد شاف الحلقة، مفيش حد شاف أنا قلت إيه، كل الناس بتردد لبعض كلام أنا ما قلتوش.. كل اللى قلته إن التخين شكله مش حلو ومش قادر يمشي على رجليه وعايش ميت، في واحدة كاتبة إني قلت ملهوش حق في الحياة، وناس تقول إني أهنتهم.. لكن كلمة عايشين ميتين دي هم اللى قالوهالي، وبتكلم على الناس اللى فوق الـ٢٠٠ و٢٥٠ كيلو".

وقدمت ريهام سعيد اعتذارا جاء فيه "أنا بعتذر لكل الناس اللي زعلت مني عن سوء فهم لأني لم أقصد إني أهين أي حد، ومش بعتذر عشان أرجع للشاشة تاني، أنا خلاص مش هشتغل في الإعلام تاني ولا التمثيل تاني، لأن أخطر حاجة على مريض السمنة وكل حاجة هو الضغط، وأنا بقالي ١٦ سنة مضغوطة".

مضيفة "جاء الوقت اللي أرتاح فيه وأقعد مع أولادي وأخلي بالي منهم، وأقعد مع جوزي ونقرب من ربنا.. ١٦ سنة بخدم الناس بس ونايمة بفكر مين عايز فلوس.. مين عايز كيس دم، ومعملتش فلوس وكانت نيتي خالصة لله سبحانه وتعالى وربنا عالم دا، وأقسم بالله العظيم عمري ما تربحت مرة ولا أخدت فلوس مرة.. عشت بضمير حي وراس مرفوعة".

وأشارت ريهام إلى أن اتهامها بأنها أخطأت عدة مرات غير صحيح قائلة "الناس اللي بتقول أنا غلطت كام مرة، أنا عمري ما غلطت ولا مرة كان دايما بيتعملي كماين لكن عشان ببقى ناجحة قوي ومسمعة قوي بتحارب، زي الواحدة اللي راحت أجرت لي واحدة وخدوا فلوس قد كده وتطوير واترميت في السجن ٤٥ يوم ظلم، لو أرجل راجل في الدنيا ميستحملش اللي استحملته نص ساعة، أنا اتبهدلت واتظلمت، أنا عايزة أعيش حياتي كويس.. أنتم خدمتوني النهاردة، كل واحد علق تعليق مش كويس، واللي ألّف تأليفة أنا ما قلتهاش، لأنكم فوقتوني وعرفتوني إني لازم أعيش لنفسي وأولادي.. كفاية كده".

وأضافت: "كفاية بهدلة بقا الواحد لازم يعيش بكرامة، وإحساس الظلم ده وحش قوي، كفاية بقا تعبت، خلاص بقا".

واختتمت ريهام "أنا ما قلتش حاجة عن التخان، كل ده تأليف وظلم بس انتم خدمتوني وأنا مش راجعة تاني، أنا اتوقفت ٣٠ مرة، وأول مرة أقول كده، أنا مش راجعة تاني، لأن عندي حاجات اهم أعملها.. ربنا وبعدين ولادي.. بشكركم جدا كل واحد ساهم في وقفي، بشكر جمهوري اللى هيفضل يدعيلي طول عمره، هتوحشوني وانتم عارفين أنا عملت ايه وده يكفي، كل الناس اللى بتدخل على المواقع من غير ما تشوف يقولها بلاش تقطع في..ولا أقولك قطّع أنا محتاجة حسنات أكتر وأكتر".

‎

اقرأ أيضا

صناع La Casa de Papel يرحبون بانضمام إليسا إلى العصابة على طريقتهم

بالصور- شيري عادل تحن لطفولتها بعد طلاقها من معز مسعود