مخرج فيلم "678" يعتذر عن انتقاداته لمنتخب مصر

محمد سلطان محمود | فى حياة المشاهير

منتخب مصر

الاثنين , 1 يوليو 2019 - 01:07 | اخر تحديث: الاثنين , 1 يوليو 2019 - 02:07

اعتذر المؤلف والمخرج محمد دياب عن حدة انتقاداته الموجهة للاعبي منتخب مصر، عقب أزمة اتهام عمرو وردة لاعب الفريق بالتحرش الجنسي، مطالبًا محمد صلاح بتقديم اعتذاره هو الأخر.

كتب دياب عبر حسابه على Facebook، موضحًا موقفه من مساندة منتخب مصر في بطولة كأس الأمم الإفريقية، قائلًا: "علقت بحرقه و غضب بحكم اني عاصرت جهد سنين عملته ناس كتير عشان تحارب التحرش و رصدت ده في فيلم قضيت سنتين بعمله، و شايف أن ده الوقت اللي تنضم بلدنا للموجة العالمية الإيجابية اللي بتتصدي ليه ... و فجأه حصلت قصه وردة و حسيت ان تأثير اللي حصل ممكن يرجعنا سنين لورا ... بل و يضر سمعتنا بره".

تابع موضحًا: "كلامي عن التحرش و عن وردة مقتنع بيه، المتحرش المتسلسل محتاج عقاب و علاج، أما كلامي عن المنتخب و عن الفيلم اللي بفكر أعمله عن قصة وردة بصراحه مكانش موزون، و ميعبرش عن أسلوبي و لا طريقتي ... و رغم أن بالذات في موضوع التشجيع ضد (وردة و من أيدوه) ... كان قصدي الأفراد مش المنتخب و رغم أني كتبتها بين قوسين عشان تتفهم برضه متفهمتش، فده يوضح اني مكنتش موفق في كلامي".

استطرد محمد دياب معتذرًا: "أنا آسف لو مكنتش موفق أو لو حد فهمني غلط في النقطه دي و أنا طبعاً بشجع المنتخب اللي طول عمره مصدر سعادتي زي ملايين المصريين (مهما كنت متضايق من تصرفات لاعيبه فيه) و شايف ان كل اللي محتاجينه اللعيبه دول هو اعتذارهم عن تأييد هروب الغلطان من غير عقاب، و أعتقد دي قيمه كلنا متفقين عليها وأنا متاكد إنهم حتى لو ماعملوش ده لسبب أخلاقي لازم يعملوه دفاعا عن بلدهم وسمعتها. فمثلاً خبر رجوع وردة المنتخب خد تغطيه سلبيه من الصحافه العالميه، علي عكس استبعاده اللي كان مسيء ليه شخصياً بس".

أضاف:" مرة أخيرة مضطر اقول بديهيات : انتقاد موضوع (زي موضوع وردة) معناه الوحيد أننا بنحب بلدنا و عاوزنها تكون احسن بلد في الدنيا، وده من غيرتنا عليها وفرحتنا بيها إنها منظمة بطولة بالشكل المشرف ده ومش عايزين ده يتأثر بأفعال تحرجنا محليا وعالميا".

اختتم محمد دياب حديثه موجها رسالة إلى محمد صلاح، قال فيها: "ولادي طول الماتش النهارده بيغنوا للمنتخب و مو صلاح، اللي شربوا حبه من كتر كلامي عليه و طلبي منهم يدعوله في كل ماتش يجيب جون، و اللي مستني منه أكتر بكتير من اللي حصل، و متأكد أنه هييجي الوقت و يعتذر هو كمان عن غلطه".

جدير بالذكر أن محمد دياب كان قد عبر عن استياءه من دعم محمد صلاح وأحمد المحمدي لزميلهم عمرو وردة في أزمة اتهامه بالتحرش الجنسي، والتي تم استبعاده من معسكر منتخب مصر المشارك في بطولة كأس الأمم الإفريقية، قبل أن يعود مجددًا بعد تخفيف عقوبته.