أشادت الفنانة نيللي كريم بالمجهود الكبير الذي بذله محمد سعدي، المنتج ورئيس مجلس إدارة الشركة المنظمة لحفل موكب نقل المومياوات الملكية، في إقامة الاحتفالية التي تابعها المشاهدون في أنحاء العالم.
وفي مداخلة هاتفية مع الإعلامية إيمان الحصري في برنامج "مساء dmc"، قالت نيللي كريم: "كانت مسؤولية عليه يعمل حفلة بالفخامة والضخامة دي، وإستايل العالم كله يقعد يتفرج عليه."
وعن انطباعها بعد مشاركتها في الحفل، قالت: "كانت تجربة جديدة بالنسبة ليا، وفي نفس الوقت مش جديدة قوي. قبل كده مع دار الأوبرا المصرية كنا نعمل حفلات أوبرا عايدة في الأقصر، وكنا بنعملها في نفس المعبد، يمكن استرجعت الذاكرة لكن المرة دي كان الموضوع بشكل مختلف خالص."
وأضافت: "المرة دي كان حدث عالمي كبير متصور بطريقة مختلفة متهيألي عمري ما شفتها في العالم، والتحضيرات والأوركسترا، وأحيي كل المشاركين وراء الكاميرا عملوا مجهود جبار، من تصميم الملابس والراقصين، ومديري التصوير والإخراج، مفيش حد ما إشتغلش من قلبه."
وتابعت: "كان عندي تصوير النهاردة في شبرا، لما رحت لقيت كم ناس كل واحد يقول آراء، وكل الناس إتفرجت وكل الناس كانت مبسوطة جدا ومن جميع المستويات. كل الناس عارفة كنت بأشتغل في دار الأوبرا المصرية سنين، لما شفت الأوركسترا والغناء وكل حاجة، أخذنا أحلى عناصر موجودة عندنا في البلد وعملنا حاجة عظيمة، ونفسي نكرر حاجات زي كده تتعمل كل سنة. عندنا حاجات كتير نحتفل بيها، ثقافة وفن، ومصر تقدر تعمل الّي محدش يقدر يعمله."
وتواصل نيللي كريم تصوير مسلسلها في رمضان القادم "ضد الكسر"، الذي تقدم فيه نموذجا للمرأة القوية.