باسم يوسف رافضا التعليق على اللاعب المصري الذي رفع علم السعودية: أنا نباتي

محرر FilFan | فى حياة المشاهير

باسم يوسف

السبت , 6 أغسطس 2016 - 18:00 | اخر تحديث: السبت , 6 أغسطس 2016 - 19:34

كشف الإعلامي باسم يوسف عن أنه يتبع نظام غذائي نباتي يواظب عليه منذ فترة، وأنه ابتعد عن أكل لحوم الحيوانات وكل ما يتدخل فيه الزيوت.

وفضل باسم يوسف أن يتكلم عن نظامه الغذائي تزامنا مع إقامة دورة الألعاب الأوليمبية المقامة حاليا في البرازيل، ورافضا التعليق على أزمة اللاعب المصري الذي رفع علم السعودية في طابور العرض بافتتاح البطولة.

وكتب باسم يوسف عبر صفحته بموقع Facebook: بمناسبة الالعاب الاوليمبية، وهنا مش حتكلم عن مين رفع علم ايه لان الناس قامت بالواجب . المهم انا عايز اتكلم في موضوع بعيد عن السياسة و بيمسني انا شخصيا. انا داخل على تلات سنين باتبع النظام النباتي. و خليني اكون دقيق و اقول ان انا مش نباتي بمعني (vegeterian) ولكني خضري او "vegan" و ده معناه اني مش باستهلك اي نوع من انواع منتجات الحيوانات بما فيها الالبان و البيض. بعكس الفيجتريان اللي بياكلهم.

وخليني دقيق اكتر و اقول اني باتبع نظام اكثر انضباطا و هو plant based whole food diet و الفرق هنا اني مش باستهلك اي شئ مصنع بما فيهم السكر و الزيوت و مش باكل الاكل المقلي. و بقول ده لان فيه vegans كتير مع التزامهم بعدم استهلاك منتجات حيوانية الا انهم بيستهلكوا كميات كبيرة من الاكل المصنع و السكر و الاكل المقلي في الزيوت و ده مش صحي.

فيه نقطة مهمة في النقاش حوالين الاكل النباتي (او الخضري تحديدا) هي ازاي ناخد كفايتنا من البروتين او الكالسيوم. البوست المرفق بيتكلم عن بطل رفع اثقال امريكي مشارك في الالعاب الاوليمبية و هو فيجان تماما. فيه امثلة لرياضيين تانيين و متبنيين نفس اسلوب الحياة. و في الايام اللي جاية حالقي الضوء عليهم. فيه اسباب كتيرة ان الواحد يقلب نباتي او خضري اهمها تحديدا السبب الاخلاقي و عدم اذية او قتل الحيوانات.

و مع احترامي الشديد للسبب ده لكن مش هو ده السبب اللي عشانه حولت للنظام النباتي. انا حولت للنظام ده لاسباب صحية بحتة و فعلا صحتي اتحسنت كتير جدا و ساعدت ناس كتيرة بامراض مزمنة انهم يحسنوا صحتهم. الكلام ده شرحه يطول و انا باتمنى ان في يوم من الايام اعمل عمل اعلامي يوضح المواضيع دي و يشرحها بالتفصيل لان فيه ناس استفادت من ده جدا و اتمنى ان الفايدة تعم اكتر. مرة تانية بوست واحد مش كفاية عن الموضوع ده و عشان كده من وقت للتاني ححط افكاري هنا على الموضوع ده. اتمنى تستمتعوا بمتابعة الالعاب الاوليمبية و تستمتعوا بصحة افضل.

وكتب باسم يوسف أيضا في Post أخر: تكملة للبوست السابق، ده رياضي اوليمبي اخر vegan او نباتي او بمعنى ادق، خضري. و مش بس هو بيتنافس في مسابقة الوثب الطويل، لا ده كمان كان لاعب كرة قدم امريكية NFL. دليل اخر على انك ممكن تبني عضلات على الاكل النباتي. ملحوظة، انا ، لا باحرم ما احله الله و لا بافرض عليك نظام و لا بقولك ده حلال و لا حرام. انا مجرد باتناقش في في نقطة محددة و هي انك ممكن تبني عضلات و تبقى رياضي عالمي حتى لو كنت نباتي.لو انت مش قادر تسيب الفراخ و اللحمةو الجبن ، الحلويات، حقك. انت حر. فيه ناس تانية بتتبنى اسلوب حياة مختلف. و على فكرة من اشهر الرياضيين النباتيين كان العداء كارل لويس اسطورة العاب القوى. انتظروا بوست مفاجئة لاول رياضية مصرية مشاركة السنة دي في الاولومبياد ، هي نباتية من ست شهور.

اقرأ أيضا
لاعب مصري يرفع علم السعودية في الأولمبياد

محمد رمضان يرد على باسم يوسف بطريقة "رفاعي الدسوقي"

باسم يوسف يرد على منتقديه لعدم نعيه رحيل زويل