باسم يوسف يتذكر والده الراحل بهذه الكلمات

وائل عادل | فى حياة المشاهير

باسم يوسف

الأربعاء , 25 مايو 2016 - 00:51 | اخر تحديث: الأربعاء , 25 مايو 2016 - 01:40

لم يفوت مقدم البرامج الساخر باسم يوسف الذكرى الأولى لرحيل والده عن عالمنا في مايو 2015.

وأعاد باسم يوسف الكلمات التي ودع بها والده العام الماضي، وعلق عليها: "الذكرى الأولى لوالدي وهذا الكلام من سنة. ربنا يرحم الجميع و يصبر الكل".

وكان باسم يوسف قد كتب عن والده في المنشور الذي أعاد نشره، 24 مايو، عبر صفحته الرسمية على موقع Facebook: " وأنا صغير فاكر قوي لما جدتي (والدة والدتي) وقعت في الحمام وجالها كسر في الحوض وعملت عملية. بعد العملية دي ما رجعتش زي الأول وفضلت حالتها تتدهور لغاية لما الشيخوخة وعوامل تانية خلتها عايشة عيشة معاناة على السرير وآدميتها وكرامتها استقلاليتها بتضيع منها يوم ورا التاني.

وأضاف:"فاكر أمي وخالتي لما كانوا بيتناوبوا على خدمتها وإزاي ده اثر في أمي جدا لدرجة إن وصيتها المستمرة طول حياتها "بلاش تخلوا حد يشوفني بالمنظر ده". وفضل العذاب ده سنوات طويلة لحد ما اتوفت جدتي. جدي وجدتي لابويا مروا بمصير مشابه لكن لفترة أقل".

واستكمل: "أصبح الهاجس ده مسيطر عليا. حاعمل إيه لو أبويا وأمي حصلهم كده؟ هل حييجي اليوم اننا نطلب لهم الرحمة من ربنا بدل ما ندعي إنهم يستمروا في الحياة من كتر القهر والمعاناة؟ من سنة ونص أمي كانت في المصيف، مش بتشتكي من حاجة. قامت، صلت الفجر، نامت. ما قامتش. ما اتعذبتش وما عذبتش حد معاها. ويمكن ربنا رحمها إنها ما شافتش ابنها بيسيب البلد ومش عارف يرجع تاني".

وأضاف: "أبويا بعديها الحمد لله ما انكسرش. وفضل عايش. وسافر ولف الدنيا وفضل يدي مشورات قانونية ويعيش حياة كاملة. وجه زارني في مكاني الجديد وانبسط واتطمن عليا. ولسه من يومين حضر عيد ميلاد حفيدته الكبيرة بين ابنه الكبير وأحفاده التانيين. لما عرفت إن عربية خبطته وأنه مش فايق وأنهم بيعملوا آشعة مقطعية على دماغه. اتمنيت إنه يا يقوم بكامل صحته يا ما يخشش في المصير اللي طول عمر الهاجس بتاعه بيطاردني. ساعة واحدة والموضوع ما طولش. أبويا حرفيا مات واقف على رجليه".