الممثل الشاب هادي خفاجة يقرر اعتزال التمثيل في مصر بسبب "وش السعد"

نهال ناصر | فى حياة المشاهير

هادي خفاجة

السبت , 2 أبريل 2016 - 16:04 | اخر تحديث: السبت , 2 أبريل 2016 - 22:04

قرر الممثل الشاب هادي خفاجة اعتزال التمثيل نهائيا في مصر والتوجه إلى أي دولة أخرى والتمثيل بها، وذلك بسبب موقف تعرض له مع القائمين على برنامج "وش السعد" للنجم محمد سعد.

وحكى هادي ما حدث معه من خلال منشور نشره عبر حسابه الشخصي في موقع التواصل الإجتماعي Facebook، جاء فيه:

"قررت أنا هادى خفاجة اعتزال التمثيل نهائياً في مصر وده بسبب الموقف اللى انا هاحكيه هو موقف فى قمة قلة الذوق اللي في الدنيا".

وتابع قائلا: "جاتلى مكالمة الساعة ١٢ بليل إن محمد سعد عايزنى فى تصوير فى حلقة من برنامج وش السعد اللى هي كانت انهارده وأنه عايز يقعد معايا، طبعاًً لبست وروحت له الساعة ١ بليل كان موجود الكاست كله ونجوم الحلقة أيتن عامر ومنة عرفة وعملنا بروفة واتفقت مع مدير الانتاج والملابس وكل حاجة واستاذ سامح عبد العزيز المخرج قعدت معاه واتكلمنا عن الشخصية واتفقنا إن التصوير بعدها بيوم. خلصت كانت الساعة ٤ الفجر روحت البيت نمت وصحيت استعديت نفسياًً إن رايح التصوير وحفظت السيناريو كان المعاد الساعه ٥ المغرب لقيت اتصال وأنا فى الطريق الساعة ٤ العصر من واحد من مساعدين الإخراج بيقولى استاذ هادى احنا اجلنا الاسكتش بتاع حلقة حضرتك وهنكلمك نقولك امتى التصوير ان شاء الله .. افتح Mbc Masr من شوية ألاقي الاسكتش بتاعى اتصور بممثل تانى؟؟ طب ليه اللف والدوران الحمد لله تاريخى مش هيقف على حلقة بس موضوع تقدير".

وأضاف ليؤكد أن قراره نهائي وأنه سيذهب ليعطي نقيب الممثلين أشرف زكي عضوية النقابة تأكيدا عى رفضه العمل في مصر مجددا: "أنا حبيت أحكى لأنى وسط حاجات كتير حصلتلى مكنتش مستحمل حركة زى دى وبكرة بإذن الله هاكون فى نقابة المهن التمثيلية و هاسلم أستاذ أشرف ذكى عضوية النقابة لأنها متلزمنيش فى شيء دلوقتى بس بجد كفاية تدمير فى المواهب واحباط فى الناس لان الوسط بجد أصبح عن عصابات تتحكم فيه".

وأختتم حديثه قائلا إنه قرر أن يمارس مهنة التمثيل خارج مصر في دول تحترم الإنسانية والمواهب: "وإن شاء الله هاكمل مستقبلي الفني في دولة تانية بتقدر الإنساني قبل المواهب والمجالات وده قرار نهائي بجد بيني و بين نفسي مش هرجع فيه".

وأرفق مع منشوره هذا صورة للسيناريو الدور الذي كان سيؤديه في حلقة برنامج "وش السعد" ليؤكد على حقيقة كلامه.

هادي خفاجة هو ممثل شاب بدأ حياته الفنية كطفل عمره 3 سنوات مع الفنان الكبير محمد صبحي، وهو من عائلة فنية، شقيقاه الأكبر فادي وشادي كلاهما عمل في التمثيل وكانت بدايتهم أيضا منذ الطفولة مع الفنان محمد صبحي.

وعمل هادي في الكثير من الأعمال السينمائية والتلفزيونية منذ طفولته ومنها: " أبو علي، شعبان الفارس، الناس في كفر عسكر، أبو ضحكة جنان، سوق الخضار" وغيرها من الأعمال.