هقول لأ ليه .. وهنعمل ايه عشان نفهم البسطاء؟

هقول لأ ليه .. وهنعمل ايه عشان نفهم البسطاء؟

| في آراء، تاريخ النشر: الخميس ، 17 مارس 2011 - 8:52
ليه محمد دياب هيقول لأ للتعديلات الدستوية؟ ليه محمد دياب هيقول لأ للتعديلات الدستوية؟
ليه (لأ ) للتعديلات الدستوريه

متاخدش قرارك عشان زهقت، او نفسك تخلص ... الدستور بيتغير مرة في العمر ولازم يتغير صح

مينفعش تخليني أوافق على كل التعديلات على بعضها، مع إن فيه منها اللي عاجبني وفي منها اللي رافضه

إزاي اوافق على قرار مصيري زي ده و معنديش وقت كفايه ولا معلومات كفاية عشان اقرر

لو قلت نعم هيجي رئيس بسلطات مطلقه وبرلمان ميعبرش عن الثوره يحط الدستور

الانتخابات اللي جايه مستحيل هينجح فيها الناس اللي عملوا الثورة، هيجي يا الاخوان يا الوطني، هل من العداله ان هما بس اللي يعملوا الدستور!!! ؟

الاستقرار

الاستقرار مش انك تقول (نعم) فنرجع زي ما كنا، الاستقرار انك تقول (لأ ) فنبدأ صح

الاستقرار معناه انك تعمل دستور جديد يخلي العالم يتطمن فيستثمر في مصر بدل ما يسحب استثماراته

الاستقرار مش هيحصل لما هنضطر (لو قلنا نعم) نعمل ٨ انتخابات في سنه واحده

لو قلنا نعم، لما البرلمان يعمل دستور جديد، ممكن يبقى فيه مواد وشروط متنطبقش على الرئيس اللي هيكون موجود ... نعمل ساعتها ايه؟؟؟؟ نمشيه؟ طب نسيبه وواحد يرفع قضيه يقول ان وجوده غير دستوري .. وهيكسبها؟

عمرك لعبت لعبه من غير ما تعرف قوانينها؟!!! ينفع ابقى الرئيس وبعدين يعملولي دستور يقولولي فيه هتحكمنا ازاي!!! طب مش فيه احتمال ميعجبنيش؟؟ ... ساعتها هيحصل ايه؟ .. هو ده الاستقرار؟

المنطق والعقل يقولوا احط قواعد اللعبه وبعدين العب ... مش العب وبعدين احط القواعد
يعني نحط قواعد الترشيح "الدستور" وبعدين اترشح ... مش اترشح وبعدين احط القواعد

إطمن

الجيش هيحترم اي قرار هناخده وفكرة التخويف بأنه ممكن يستولى على الحكم مستحيييله بعد ثوره شعبيه

متخليش حد يخوفك ويقولك لو قلت (لأ) الوضع هيبقي مجهول ... بالعكس لو قلت (لأ) هنعمل دستور جديد وهنضمن انه يعبر عن مصر كلها

الدستور الجديد مش هياخد اكتر من تلات شهور بشهادة فقهاء دستوريين

اللي خايف الفوضى تزيد، هي ممكن تزيد لو محلناش حلول حقيقيه

و اللي خايف الاقتصاد يتضرر ... هو اكيد هيتضرر لو الوضع فضل مشوه

بنقول عاوزين دستور جديد محمي من كل القوى الوطنيه المحتشده الآن ... مش ده آمان اكتر ليا وليك؟؟

قول لأ للتعديلات الدستوريه ومتخاطرش بمستقبل مصر



خلصت كلامي

بس اللي جاي اهم

لو انت علي تويتر هتفتكر ان الناس كلها هتقول لأ
ولو انت على فيسبوك هتفتكر ان اكتر من خمسين في الميه هيقولوا لأ
بس لو نزلت الشارع هتكتشف الحقيقه، ان ٧٥٪ من الناس البسيطه ناويه تقول نعم

هيقولوا نعم عشان معلومات ناقصه ومغلوطه وعشان فاكرين ان (نعم) تعني الاستقرار
وعشان اللي بيقولوا (نعم) مركزين في التأثير على الشارع مش على الفيس بوك

مستقبل بلدك على المحك ... لو الاستفتاء طلع نعم هيبقى فيه احتمال ان الثوره تتسرق ... ينفع تسيب ده يحصل؟؟

لو مقتنع بأن لازم نقول (لأ ) يبقى لازم تبقى ايجابي

اكيد لو تقدر اعمل شير، بس مش كفايه

عاوزين ناس تصمم صفحه مكتوب فيها الكلام ده بشكل كويس (او اي كلام تاني مقنع) و ميزيدش عن صفحه واحده

عاوزين نعمل صفحه على الفيس بوك ونطلب من الناس كلها انها تفهم الكلام وتطبعه وتوزعه على البسطاء ويحاولوا يفهموهم

عاوزين يوم الاستفتاء، في مصر كلها، شباب محترم، هادي، باسم ... يبقى معاه الورق ده، وفاهم كل المبررات اللي عشانها بنقول لأ ويبقوا قدام اللجان بيفهموا الناس اللي مش فاهمه ... تاني هقول شباب هادي، محترم ، باسم، متسامح ويعرف يتعامل مع الاختلاف

الصفحه دي ممكن يبقي فيها اماكن الاستفتاء في مصر كلها، و تطلب متطوعين لكل مكان في مصر كلها

كنت راكب مع تاكسي فبقوله هتختار ايه فقالي (نعم) طبعاً عشان مينفعش نكمل بالدستور ده!!! ناس كتير هتقول نعم للأسباب الغلط ... كل اللي محتاجينه كلمتين منك

خليك ايجابي وشارك في توعيه البسطاء

كلمات متعلقة محمد دياب
comments powered by Disqus

2004-2015 © FilFan.com يتم تطويره وإدارته بواسطة

clicking on ".search-btn" adds class "open" on "#search-overlay" clicking on ".close, .confirm" removes class "open" on "#search-overlay" clicking on ".social-btn" adds class "open" on "#social-overlay" clicking on ".close" removes class "open" on "#social-overlay"