الجيش والشعب بين التظاهرات والتظاهر

الجيش والشعب بين التظاهرات والتظاهر

| في آراء، تاريخ النشر: الأحد ، 27 فبراير 2011 - 11:24
لو بتقري المقاله دي، أرجوك تحاول تحرر نفسك من أي أفكار مسبقة ... تعالى ننقاش اللي بيحصل بمنتهى الحيادية ... هنتكلم عن أكتر ملف حساس دلوقتي... الجيش.

كلنا تقريباً متفقين على وطنية الجيش وأهمية دوره في الوقوف إلى جانب الثورة ... ومن كتر ما احنا كشعب دايماً نفسياً محتاجين لكبير، فبسرعة عملنا الجيش كبيرنا وبصراحة الناس كانوا قد المسؤلية، وأنا شخصياً وعقلاء كتير طلعنا بندعو بالتهدئة وأهمية الثقة في الجيش.

دايماً كلامهم مطمئن، وتأكيد أن كل المطالب هتتحقق بس المشكلة الوقت ... وكان ناس بتطلع وتقول المشكلة مش مشكلة وقت ولا حاجة دول بيطبخوا حاجة وده جزء من الثورة المضادة ... بصراحة مكانش عندي رأي قاطع وبل بالعكس فضلت أني أبدأ العلاقة بالثقة.

بس الواحد بدأ يلاحظ بعض الأشياء

بما تفسر: أن يتم تغيير جميع الوزراء إلا وزراء الوزارات السيادية (الوزارات التي تتحكم حقيقة في مقاليد الأمور".

وزارة العدل "السلطه التشريعية" على رأسها ممدوح مرعي -المعروف بأنه أكثر من نكل بالقضاة المعارضين.

وزارة الداخلية "السلطة التنفيذية" على رأسها محمود وجدي، وزير الداخليه يوم موقعة الجمل، والذي فاجأ الجميع منذ أيام بتصريحات من العصر القديم، عن القلة المندسة، والقناصة الأجانب، ولم يعترف بأي تقصير من جانب الشرطة، مما أدى لإعادة الاحتقان بين الشرطة والشعب ... وظهر مدير أمن دمنهور بعدها بنفس الطريقة القديمة يهدد ويتوعد، بل ويقر أنه يحاول الإيقاع بين الشعب والمتظاهريين.

وزير الخارجية "الاتصال بالعالم"، على رأسها أحمد أبو الغيط، الذي بشهادة الخبراء هو أسوأ من تولى وزارة الخارجية، وهدد المتظاهرين أثناء الثورة أن الجيش لن يسمح بالفوضى – أي التظاهرات.

عدم تغيير رؤساء الصحف القومية (المطبلاتية) حتي الآن –عندما صرح أحد قادة المجلس العسكري في العاشرة مساءً طالباً منهم أن يستقيلوا، اتصل به رئيس الشئون المعنوية اللواء إسماعيل عتمان (على الهواء) يعاتبه على تصريحه، ويطلب من رؤساء الصحف القومية ألا يستقيلوا.

اللي هيقرا أهرام السبت هيعرف هما مغيروهمش ليه؟؟ الأهرام بتستعبط وتقول إن الناس نزلت امبارح عشان تحاكم مبارك والفساد!!!!!!! مجابوش السبب الرئيسي والوحيد للمظاهرة، وهو إسقاط حكومة شفيق ... يعني نفس ألعاب زمان.

لما شفيق يوقف إعادة برنامج "واحد من الناس" اللي كان فيه إبراهيم عيسي بيطالب بإسقاط شفيق!!! ويتوقف عمرو الليثي من الخروج على الهوا عشان الباقيين يخافوا.

لما وزير الأوقاف "الأزهري" يتعمد أن يدعوا الشيخ محمد حسان "السلفي" في مسجد النور، و هو عارف إن هيجيي ملايين، وإنه هيتكلم عن المادة اتنين من الدستور ... عشان يخوفوا بيه المسيحيين ... مع ورود معلومات عن أن فيه جهات أمنية بتسخن المسيحيين عشان يصروا على تغيير الماده اتنين، فتحصل مواجهه بينهم وبين السلفيين.

ألا يثير كل هذا الشك في النفوس ... أرجوك فسر لي لماذا يختار شفيق أن يظل في مواقع السيطرة الحقيقية أشخاص تابعيين لأقصي درجه للنظام القديم؟!!! مش طبيعي أن الفار يبدأ يلعب في عب ناس كتير؟؟؟

وهبقي أكثر وضوحاً وأسأل بصراحة: لماذا يريد (الجيـــــــــش) مش (شفيق) أن يظل رجال النظام القديم في السلطة؟

الحقيقة أن الشعب والجيش بيلعبوا مع بعض لعبة (المستهبلة) الجيش هو اللي بيعمل كل حاجة بس يروح مستهبل وملبسها لشفيق ... يقوم الشعب عشان عاوز ومحتاج يصدق إن الجيش هو بابا و ماما وأنور وجدي، يروح مستعبط ومهاجم شفيق وينزل في مظاهرات ضده ... ويعمل إنه مش واخد باله إن المسؤل الحقيقي هو الجيش.

الثورة المضادة اللي الناس بتتكلم عليها، بتحصل تحت سمع وبصر الجيش والشعب يروح مستهبل تاني وفرحان قوي بالبيان اللي بيؤكدوا فيهم تصديهم للثورة المضادة ... طب فيييييين!!!!! عاوزين تقضوا علي الثوره المضادة شيلوا أي واحد ليه علاقة بالنظام القديم.

لما يطلع فيديو لمدير أمن دمنهور بيقول فيه صراحة إنه بيحاول يقوم الناس علي المتظاهريين ... ده مش محاولات ثوره مضادة!!!! دي لوحدها يتشال فيها وزير الداخلية.

بعد ده كله ما تفتكروش إن من حق الناس إنها تطالب بإقالة حكومة شفيق!!! مش من حق الناس إنها تخاف علي ثورتها!!! مش من حق الناس إنها تبقى متأكدة إن فيه مؤامرة ولااااااازم يتصدولها .... مش من حقها إنها أضعف الايمان إنها تظن أن لو النظام القديم في إيده كل ده، ممكن يدعم مرشح في انتخابات الرئاسة، ويبقي كأنك يا أبو زيد ما غزيت! ... مش من حق الناس إنها تتظاهر وتطالب بالتصدي لمحاولات إجهاض الثوره دي وتبات كمان في الميدان زي ما هي عايزة؟

طبعاً كل ده كوم واللي حصل الجمعة 25 فبراير كوم تاني ... الجيش ضرب المتظاهريين وطردهم بالقوة!!!! أنا مش مصدق عدم الحكمة بتاعة اللي خد القرار ده!!!! تضربونا عشان شفيق!!!! هو شفيق أهم من مبارك؟؟؟ هو شفيق أهم من مصر؟؟؟؟ ولا فيه حاجة بتدبر؟؟؟؟؟؟؟؟؟؟؟؟ للأسف مفيش تفسير تاني.

هتقولي الكلام الخايب بتاع أصلهم كانوا بيتظاهروا بعد الحظر ... هقولك إن لولا الناس اللي فضلت تتظاهر 18 يوم بعد الحظر مبارك عمره ما كان هيمشي.

هتقولي حرام عليك اديهم وقت ... هقولك فووووووووووووووق ... هما كان عندهم وقت يغيروا كل الوزارات ومعندهمش وقت يغيروا التلات وزارات المتحكمين في البلد!!!؟

هما ليه اتحججوا قانونياً بأنهم ميقدروش يعزلوا حد من الصحف القومية وفي ثانية لما حبوا راحوا عزلوا نقيب الموسيقين منير الوسيمي!!!؟

هتقولي حرام عليك الجيش هو آخر حاجة نتسند عليها ... هقولك نفس الكلام اللي كنت بقوله أيام إسقاط مبارك .. وجه اتهاماتك وإحباطاطك في المكان السليم .. للي بيحاولوا يسرقوا الحلم .. مش المطالبين بالحق ..

للأسف ضرب الجيش للمتظاهرين تسبب في بداية النهاية للعبة المستهبلة ... والناس هتبدأ تكسر خوفها من أن ميكونلهاش ضهر وهيبدأوا يواجهوا تخوفاتهم الحقيقية.

وأوعي تقولي الجيش اعتذر، الاعتذار يكون بتحقيق المطالب اللي الناس عاوزاها ... مشوا حكومة شفيق انهاردة قبل بكره ... قبل ما الناس تفقد الثقة تماماً فيكوا وساعتها هيبقي مطلب أساسي تكوين مجلس رئاسي وهو بصراحة عين العقل.

في اعتقادي إن فيه انقسام حاد بين قيادات الجيش، بل أنا متأكد إن ده حاصل وبدعي ربنا إن الجانب اللي مع الحق ينتصر بسرعة، لأن الحق والشعب هينتصر هينتصر بإذن الله.

على فكرة معظم اللي بيقولوا نسيب حكومه شفيق، وبيصفوا القرار ده إنه عين التعقل هما اللي مش بيفكروا بعقلهم بل بيحركهم العاطفة.. عاطفة الخوف ... أقولك على دليل؟ فاكر لما كنت بتتفرج على الثوره في تونس ومشي بن علي وجه الغنوشي .. بذمتك كنت مع التونسيين في إنهم يسقطوا الغنوشي ولا لأ؟ طبعاً كنت مع إسقاط الغنوشي، والغنوشي بالظبط هو شفيق ... بس عشان كنت شايف من بره، من غير خوف وعارف تحكم بعقلك.

والله العظيم أنا بقول الكلام ده عشان بتمني إن صورة الجيش متدمرش تماماً في عنين الناس ... وده مش هيحصل إلا بالتخلص من النظام القديم بجد مش كده وكده.

ونصيحة: أبوس إيدك ما تكونش رأيك من علي الفيس بوك ... كون رأيك من الجرائد المستقلة، من مثقفين حقيقيين ... كون رأيك من المحللين الموثوق في استقلالهم ونزاهتهم ... عمرو حمزاوي، مأمون فندي، عمرو الشبكي، حسنين هيكل، فهمي هويدي، وائل قنديل ... أنا ذكرت بعض المستقليين مش معارضيين عشان متقولش دول كانوا معارضين مالأول .

ننصيحة أخيرة للسادة الزملاء الثوار "العصبيين" بالراحة علي الناس شوية ... لو اختلفوا معاكوا ومش فاهمين وجهة نظركوا فهموهم .. محدش يتعامل إنه معاه صك الحقيقة المطلق، هتخسر كده الناس ... وطبيعي إن الناس تبقي متلخبطة، وطبيعي إن خوف الناس كلها بما فيهم أنا مخلينا بنتمني نلاقي ضهر نتسند عليه ... حتي لو معني كده إننا نغمي عنينا عن حقايق واضحة ... متخلوش الناس تكره الثورة، أنا عارف إنكوا بيصعب عليكوا إنكوا بتضحوا وبيطلع عينيكوا وفيه ناس بتنتقدكوا بس القفش هيخسرنا الناس ... اللي من غيرهم مفيش ثورة.

علي المستوي الشخصي، لو اللي بيقري متابع مواقفي، فأنا بحاول أبقي متزن وناديت مع مجموعة من الناس إلى التهدئة والتسامح مع فكرة القوائم السوداء، وفتح صفحة جديدة مع الشرطة بعد ما يعتذروا ويتحاسب المخطيء ... "يعني أنا مش من المعاندين" بس انهارده بقولها بمنتهي الوضوح ... الثورة في خطر ومحتاجة كل واحد فينا ... وبلاش الناس تكرر أخطائها تاني وتفتكر إن الوطنية هى التهدئة ... الوطنية هى التعقل قبل إصدار أحكام، ومساندة القرار اللي يحافظ على مكاسب الثورة .. بدل كل التضحيات دي ما تبقي راحت هدر ... وأنا عن نفسي في الشــــــــــــــــــــــــــــــــــارع ويا ريت مصر كلها تبقي في الشارع يوم الجمعة.

comments powered by Disqus

2004-2015 © FilFan.com يتم تطويره وإدارته بواسطة

clicking on ".search-btn" adds class "open" on "#search-overlay" clicking on ".close, .confirm" removes class "open" on "#search-overlay" clicking on ".social-btn" adds class "open" on "#social-overlay" clicking on ".close" removes class "open" on "#social-overlay"